2016-cı ilin Aprel döyüşləri Azərbaycanın müasir hərbi tarixində mühüm mərhələlərdən biri kimi yadda qalmışdır. Bu döyüşlər Azərbaycan Ordusunun yüksək döyüş hazırlığını, xalqımızın əzmini və Ali Baş Komandan İlham Əliyevin qətiyyətli siyasətini bütün dünyaya nümayiş etdirdi. Aprel döyüşləri, 2020-ci ildə qazanılmış möhtəşəm Zəfərə gedən yolun başlanğıcı oldu və Ermənistan ordusunun uydurduğu məğlubedilməzlik mifini tamamilə darmadağın etdi.
2016-cı ilin aprelində Ermənistan Silahlı Qüvvələri cəbhə xəttində təxribatları daha da intensivləşdirərək mülki əhalini hədəf aldı. Bu hücumlar nəticəsində dinc sakinlər həlak oldu, evlər dağıdıldı. Azərbaycan Ordusu düşmənin bu təxribatlarına cavab olaraq sürətli və dəqiq əks-hücum əməliyyatına başladı. Aprel döyüşləri əsasən Tərtər, Ağdam, Füzuli və Cəbrayıl rayonlarını əhatə etmişdi. Azərbaycan Silahlı Qüvvələri qısa müddətdə düşmənin müdafiə xəttini yararaq strateji əhəmiyyətə malik yüksəklikləri azad etdi. Bu yüksəkliklər arasında xüsusilə Lələtəpə və Talış istiqamətində əldə edilən uğurlar çox mühim əhəmiyyət kəsb edirdi.
Bu əməliyyatlar təkcə torpaqların azad olunması ilə nəticələnmədi, eyni zamanda Azərbaycan Ordusunun müasir döyüş taktikalarına və yüksək peşəkarlığa malik olduğunu sübut etdi. Düşmən ordusu ağır itkilər verərək geri çəkilməyə məcbur oldu, onların illərlə qurduğu müdafiə səddi bir neçə saat ərzində yarıldı.
Azərbaycan Respublikasının Prezidenti, Ali Baş Komandan İlham Əliyev Aprel döyüşləri zamanı göstərdiyi qətiyyətli mövqe ilə bir daha sübut etdi ki, ölkəmiz heç vaxt işğalla barışmayacaq. Azərbaycan Ordusunun gücü, xalqın öz ordusuna inamı və dövlət rəhbərliyinin uzaqgörən siyasəti bu döyüşlərdə qələbənin əsas şərtlərindən biri oldu. Aprel döyüşlərindən sonra Prezident İlham Əliyev çıxışlarında dəfələrlə vurğulamışdır ki, Azərbaycan öz ərazi bütövlüyünü bərpa edəcək və bunun üçün bütün zəruri addımlar atılacaq. Bu döyüşlərdən sonra ordu quruculuğu daha da sürətləndirildi, hərbi texnika və şəxsi heyətin hazırlığı daha yüksək səviyyəyə çatdırıldı.
Aprel döyüşləri Azərbaycanın 44 günlük Vətən müharibəsinə hazırlıq mərhələsi oldu. 2020-ci ildə Azərbaycan Ordusu Ali Baş Komandanın rəhbərliyi ilə 30 il işğal altında olan torpaqlarımızı azad etdi. Bu qələbə Azərbaycanın hərbi qüdrətinin, siyasi iradəsinin və xalq-ordu birliyinin parlaq təzahürü oldu. Vətən müharibəsində qazanılan zəfərdən sonra 2023-cü ildə Azərbaycan Ordusu Qarabağda qalan separatçı qruplaşmalara qarşı lokal antiterror tədbirləri həyata keçirdi. Bu əməliyyatların nəticəsində ölkəmizin ərazi bütövlüyü tam təmin olundu və Qarabağda qanunsuz erməni silahlı qüvvələrinin mövcudluğuna son qoyuldu. Aprel döyüşləri Azərbaycan xalqının tarixi mübarizəsində dönüş nöqtələrindən biri oldu. Bu qələbə xalqımıza öz gücünə inamı qaytardı və Azərbaycanın haqq savaşında qələbəyə gedən yolunu açdı. 2016-cı ildə başlanmış bu proses 2020-ci ildə Vətən müharibəsi və 2023-cü ildə antiterror əməliyyatları ilə tamamlandı.
Bu tarixi hadisələr zamanı canlarını qurban vermiş şəhidlərimizin xatirəsi daim anılacaq, onların qəhrəmanlığı gələcək nəsillərə örnək olacaqdır. Azərbaycan Ordusu göstərdi ki, torpaqlarımızın müdafiəsi və azadlığı naminə hər zaman döyüşməyə və qalib gəlməyə qadirdir.