Son illərdə Azərbaycanın Afrika qitəsi ölkələri ilə siyasi, iqtisadi və humanitar əlaqələri daha da genişlənməkdədir. Ölkəmiz həm Qoşulmama Hərəkatına sədrliyi dövründə, həm də ikitərəfli münasibətlər çərçivəsində Afrika ölkələri ilə əməkdaşlığın inkişafına xüsusi önəm vermişdir. Bu çərçivədə Somali Federativ Respublikası ilə əlaqələrin dərinləşdirilməsi qarşılıqlı maraq doğurur. İki ölkə arasında siyasi dialoqun intensivləşməsi, iqtisadi və müdafiə sahələrində əməkdaşlıq perspektivləri Azərbaycanın Afrika qitəsində möhkəmlənən rolunun göstəricisidir.
Fevralın 12-də Bakıda Azərbaycan Respublikasının Prezidenti İlham Əliyev və Somali Federativ Respublikasının Prezidenti Həsən Şeyx Mahmud arasında görüş keçirilib. Görüşdən sonra dövlət başçıları mətbuata bəyanatla çıxış ediblər. Prezident İlham Əliyev bildirib ki, bu gün imzalanmış sənədlər iki ölkə arasında çoxşaxəli əməkdaşlıq qurmaq niyyətini aydın şəkildə nümayiş etdirir. O, əldə edilən razılaşmaların həyata keçiriləcəyinə və ikitərəfli münasibətləri yeni səviyyəyə yüksəldəcəyinə əminliyini ifadə edib. Dövlət başçıları görüş zamanı regionlardakı geosiyasi vəziyyəti və mövcud çağırışları geniş müzakirə ediblər. Prezident İlham Əliyev Azərbaycanın ərazi bütövlüyünə və suverenliyinə qarşılıqlı dəstəyi vurğulayaraq, terrorçuluq və ekstremizmə qarşı mübarizədə ortaq mövqeyin möhkəmləndirilməsinin vacibliyini qeyd edib. O, həmçinin Azərbaycanın 1990-cı illərdən başlayaraq, beynəlxalq səviyyədə tanınmış ərazilərinin işğaldan azad edilməsi ilə nəticələnən proseslər barədə məlumat verib.
Dövlət başçısı çıxışı zamanı elm və təhsilin ikitərəfli əlaqələrdə xüsusi əhəmiyyət kəsb etdiyini bildirib. O, Somalidən olan tələbələrin xüsusi təqaüd proqramı çərçivəsində Azərbaycanda təhsil aldıqlarını qeyd edərək, bu gün imzalanan sənədlərin bu sayın artırılmasına imkan yaradacağını vurğulayıb. Görüş ərzində eyni zamanda, Azərbaycan və Somali arasında iqtisadi əməkdaşlığın genişləndirilməsi müzakirə olunub. Prezident İlham Əliyev Azərbaycanın Somali iqtisadiyyatına sərmayə qoymaq imkanlarını müzakirə olunduğunu bildirib. O, Azərbaycanın nümayəndə heyətinin Somaliyə səfəri zamanı potensial əməkdaşlıq sahələrinin müəyyən edildiyini və sərmayə imkanlarının nəzərdən keçirildiyini qeyd edib. Xüsusilə infrastruktur, liman qurğuları və kənd təsərrüfatı sahələrinin qarşılıqlı maraq doğurduğu vurğulanıb.
Həmçinin tərəflər arasında müdafiə sahəsində əməkdaşlığa dair sənəd imzalanıb. Prezident İlham Əliyev Azərbaycanın müdafiə sənayesi sahəsində əldə etdiyi nailiyyətlərdən bəhs edərək, ölkənin müdafiə avadanlıqlarının əhəmiyyətli hissəsini istehsal etdiyini və bu sahədə ixrac potensialına malik olduğunu bildirib. Ölkə başçısı Somalinin müdafiə imkanlarının gücləndirilməsinə dəstək verməyə hazır olduğunu qeyd edib. Görüş zamanı iki ölkənin beynəlxalq təşkilatlar çərçivəsində bir-birinə dəstək verməsi məsələsi də müzakirə edilib. Prezident İlham Əliyev Azərbaycan və Somalinin BMT, İslam Əməkdaşlıq Təşkilatı və digər beynəlxalq qurumlarda əməkdaşlığının davam etdiriləcəyini bildirib.
Səfər çərçivəsində Dövlət xidmətləri sahəsində əməkdaşlığa dair Anlaşma Memorandumu, Yaşıl enerji sahəsində əməkdaşlıq haqqında Anlaşma Memorandumu, Təhsil sahəsində əməkdaşlıq haqqında Saziş, Müdafiə və müdafiə sənayesi sahələrində əməkdaşlıq haqqında Sazişlə bağlı mühim əhəmiyyyət kəsb edən sənədlər imzalanıb. İki ölkə liderləri imzalanan sənədlərin Azərbaycan-Somali əlaqələrinin daha da möhkəmlənməsinə töhfə verəcəyini və əməkdaşlığın yeni mərhələyə qədəm qoyduğunu bəyan ediblər.
