7 may 2025-ci il tarixində Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lamın Azərbaycana rəsmi səfəri tarixi əhəmiyyət kəsb edən siyasi hadisə kimi yadda qaldı. Prezident İlham Əliyev bu yüksək səviyyəli səfəri Azərbaycan-Vyetnam münasibətlərinin inkişafında mühüm dönüş nöqtəsi kimi qiymətləndirib. Səfərin nəticələri ilə bağlı verilən ikitərəfli bəyanat da ölkələrimiz arasında əməkdaşlığın gələcək perspektivlərini aydın şəkildə ortaya qoydu.
Prezident İlham Əliyev bəyanatında xüsusilə vurğuladı ki, bu səfər çərçivəsində imzalanmış sənədlər arasında “Azərbaycan Respublikası ilə Vyetnam Sosialist Respublikası arasında Strateji Tərəfdaşlığın qurulması haqqında Birgə Bəyanat” xüsusi əhəmiyyətə malikdir. Bu siyasi sənəd ölkələrarası münasibətləri tamamilə yeni, daha yüksək mərhələyə yüksəldir. Dövlət başçısı bu sənədin gələcək ikitərəfli əməkdaşlıq üçün möhkəm zəmin yaradacağını və əlaqələrin sistemli, məqsədyönlü şəkildə inkişaf etdirilməsini təmin edəcəyini bildirib.
Azərbaycan və Vyetnam arasında bu günə qədər aparılmış müzakirələr və imzalanmış sənədlər onu göstərir ki, tərəflər ticarət, iqtisadiyyat, energetika, nəqliyyat, təhsil, mədəniyyət və digər sahələr üzrə əməkdaşlığı dərinləşdirmək niyyətindədir. Prezident İlham Əliyev bildirdi ki, energetika sahəsində atılan addımlar və müvafiq anlaşma memorandumları qarşılıqlı sərmayə qoyuluşu imkanlarını genişləndirəcək. Hər iki tərəf Azərbaycanın neft-qaz sektorundakı təcrübəsindən və Vyetnamın iqtisadi potensialından faydalanmağa hazır olduqlarını nümayiş etdirdi. Bundan əlavə, ticarət dövriyyəsinin neft satışından asılılığını azaltmaq məqsədilə qarşılıqlı informasiya mübadiləsi, investisiya imkanlarının təşviqi və biznes dairələrinin maarifləndirilməsi vacib amil kimi dəyərləndirildi. Hökumətlərarası Komissiyanın tezliklə keçiriləcək iclası bu sahədə konkret layihələrin reallaşdırılmasına təkan verəcək.
Azərbaycanın bərpaolunan enerji sahəsində əldə etdiyi uğurlar və bu sahəyə dair gələcək planları da müzakirələrin əsas mövzularından biri oldu. Prezident İlham Əliyev 6500 meqavatlıq təmiz enerji gücünü əhatə edən layihələrə toxunaraq, Vyetnam şirkətlərini bu sahədə birgə investisiya qoyuluşuna dəvət etdi. Həmçinin Azərbaycanın Vyetnamda enerji sektoruna sərmayə yatırmağa hazır olduğu bildirildi. Digər strateji istiqamət kimi müdafiə sənayesində əməkdaşlıq imkanları qeyd edildi. Hər iki ölkədə bu sahədə mövcud olan texnoloji və sənaye potensialı gələcəkdə birgə müəssisələrin yaradılması və təcrübə mübadiləsi baxımından əlverişli şərait yaradır.
Azərbaycan və Vyetnam yalnız ikitərəfli münasibətlərdə deyil, beynəlxalq müstəvidə də ortaq mövqedən çıxış edirlər. Prezident İlham Əliyev çıxışında Vyetnamın bir neçə il öncə BMT Təhlükəsizlik Şurasında Azərbaycana verdiyi dəstəyin unudulmaz olduğunu da vurğulayıb. Həmçinin qeyd edilib ki, Qoşulmama Hərəkatı çərçivəsində aparılan uğurlu birgə fəaliyyət, beynəlxalq hüququn aliliyi və ölkələrin suverenliyinə hörmət prinsipi hər iki dövlətin xarici siyasətinin əsas dayaqlarıdır. Prezident bir daha bəyan etdi ki, mübahisəli məsələlərin yalnız sülh yolu ilə və beynəlxalq hüquq çərçivəsində həllinə üstünlük verilməlidir. Prezident İlham Əliyev mətbuata verdiyi bəyanatın sonunda bildirdi ki, Azərbaycan və Vyetnam bir çox məsələlərdə eyni baxış bucağından çıxış edir, ortaq maraqlara və oxşar inkişaf strategiyalarına sahibdirlər. Məsafələrin uzaq olmasına baxmayaraq, bu iki dost ölkə nəqliyyat və logistika imkanları, xüsusilə Şərq-Qərb və Şimal-Cənub dəhlizləri vasitəsilə daha sıx inteqrasiya imkanlarına malikdirlər.
Baş katib To Lamın Azərbaycana ilk rəsmi səfəri iki ölkə arasında strateji tərəfdaşlıq yolunda möhkəm təməl yaratdı və gələcəyə böyük ümidlər verdi. Bu səfər çərçivəsində imzalanmış on bir mühüm sənəd – o cümlədən strateji tərəfdaşlıq haqqında Birgə Bəyanat, energetika, müdafiə, ədliyyə, mədəniyyət, rəqəmsal inkişaf və biznes sahələrində əməkdaşlığa dair anlaşma memorandumları – Azərbaycan ilə Vyetnam arasında münasibətlərin hüquqi və institusional əsaslarını daha da gücləndirəcəkdir
Səfər vaxt baxımından qısa olsa da, Prezident İlham Əliyevin vurğuladığı kimi, məzmun baxımından olduqca zəngin və məhsuldar oldu. Baş katib To Lamın Azərbaycana ilk rəsmi səfəri iki ölkə arasında strateji tərəfdaşlıq yolunda möhkəm təməl yaradaraq gələcək əməkdaşlıq üçün böyük ümidlər verdi.
