Azərbaycan Respublikasının Prezidenti cənab İlham Əliyevin dünyanın aparıcı informasiya agentliklərinə və digər müxtəlif media qurumlarına verdiyi müsahibələr Azərbaycanın milli maraqlarını qorumaq və ölkəmizin mövqeyini beynəlxalq arenada gücləndirmək baxımından xüsusi əhəmiyyət kəsb edir. Dövlət başçısının çıxışları, əsasən, regional və qlobal səviyyədə əməkdaşlıq, enerji təhlükəsizliyi və beynəlxalq hüquq prinsiplərinin müdafiəsi kimi strateji mövzuları əhatə etməkdədir. Bu müsahibələr yalnız iqtisadi və siyasi məsələlərlə məhdudlaşmır. Prezident İlham Əliyev Azərbaycanın tarixi, mədəniyyəti, multikultural dəyərləri və dinlərarası dialoq sahəsindəki uğurlarını da müvəffəqiyyətlə təqdim edir. Dövlət başçısı beynəlxalq tribunadan istifadə edərək, Azərbaycanın haqq səsini dünya ictimaiyyətinə çatdırır, milli maraqları prinsipial şəkildə müdafiə edir və ölkəmizin mövqeyini aydın və təsirli formada ifadə edir. Bu intervülər müntəzəm olaraq təkcə Azərbaycanın deyil, həm də regionun gələcək inkişafı üçün strateji bir yol xəritəsi kimi qiymətləndirilməkdədir.
Prezident İlham Əliyevin “Rossiya Seqodnya" Beynəlxalq İnformasiya Agentliyinə verdiyi müsahibə ölkədaxili və beynəlxalq prosesləri düzgün şəkildə qiymətləndirmək baxımından xüsusi əhəmiyyət kəsb edir. Dövlət başçısı çıxışında Azərbaycan və Rusiya arasında əlaqələrə toxunaraq qeyd edib: “Bu gün Rusiya və Azərbaycan iki etibarlı tərəfdaşdır. Müttəfiqlik Qarşılıqlı Fəaliyyəti haqqında Bəyannamə 2022-ci il fevralın 22-də imzalanıb. Regionumuzda və bütövlükdə dünyada vəziyyət əhəmiyyətli dərəcədə dəyişib, lakin bu, Rusiya ilə Azərbaycan arasında əməkdaşlığın xarakterinə və formasına təsir etməyib. Hesab edirəm ki, belə bir Bəyannamənin imzalanması bizim 30 ildən artıq bir müddətdə birlikdə keçdiyimiz, fəal işlədiyimiz, həm iqtisadi-ticari, həm də siyasi sahələrdə əməkdaşlıq potensialını artırdığımız və müxtəlif çətin vəziyyətlərdə bir-birimizi sınadığımız həmin böyük yolun nümayiş etdirilməsidir”.
Prezident İlham Əliyev xarici siyasətinin xüsusiyyətlərinə görə istər Qərbdə, istərsə də Şərqdə Azərbaycanın tamamilə müstəqil aktor kimi qəbul edildiyini xüsusi vurğulayıb və beynəlxalq öhdəliklərə toxunub. Azərbaycanın qardaş Türkiyə ilə münasibətlərindən söhbət açan dövlət başçısı Türkiyə ilə Azərbaycan arasında imzalanmış Müttəfiqlik haqqında Bəyannamədə təhlükə və ya təcavüz zamanı qarşılıqlı hərbi yardımı nəzərdə tutan bəndin olduğunu xüsusi qeyd edərək ümumi xarici təhlükələrə qarşı iki dövlətin birgə immunitetinin formalaşdığını nəzərə çatdırıb. Dövlətlərarası hərbi təlimlərimizin Qafqazda sabitliyin mühim amili olduğunu bildirən ölkə başçısı, İkinci Dünya müharibəsi nəticəsində yaranmış reallıqların bu proseslərdə əhəmiyyətli rol oynadığından bəhs edib. Prezident İlham Əliyev həmçinin Gürcüstan-Azərbaycan əlaqələrinin də yüksək səviyyədə olmasından məmnunluğunu dilə gətirib və qonşu dövləti çox mühim tərəfdaş və yaxın dost deyə qiymətləndirib.
Riyakar siyasət həyata keçirən Fransa hökumətini kəskin şəkildə tənqid edən Prezident İlham Əliyev, məhz adı çəkilən dövlətin regionda sülhə əsas maneçilik törətdiyini bariz şəkildə diqqətə çatdırıb. Pezident daha sonra qeyd edib: “Makron hökumətinin Ermənistana tədarük etdiyi silahlar hücum silahlarıdır, öldürücüdür və Azərbaycan üçün praktiki təhlükə yaradır. Nəzərə alsaq ki, Ermənistanla sərhədimizin uzunluğu min kilometrdən çoxdur, bir çox yaşayış məntəqələri sərhədə yaxın yerləşib və bu yaşayış məntəqələrinin əksəriyyətinə keçmiş köçkünlər qayıdırlar, təbii ki, biz bu prosesi yalnız kənardan müşahidə edə bilmərik. Əlbəttə ki, Fransa bu məsələdə liderlik edir. İkinci yerdə Hindistan, üçüncü yerdə isə ABŞ-dır. Fransa və Hindistan Ermənistanı öldürücü silahlarla təmin etdiklərini gizlətmirlər, - hətta bir növ, yəqin ki, bizim acığımıza nümayişkaranə cəsarət göstərirlər, - ABŞ isə bunu etiraf etmir. Halbuki, biz Ermənistanın hava limanlarına enən və oraya silah daşıyan hərbi nəqliyyat təyyarələrini izləmişik” - Fransız kolonializminin iyrənc simasının insan hüquq və haqlarının pozulması ilə aydın şəkildə göründüyünü bildirən dövlət başçısı Fransada haliyədə fəaliyyət göstərən hakimiyyət nümayəndələrinin mahiyyət etibarilə Fransanı uğursuz dövlətə çevirdiyini bəyan edib.
2025-ci ildə növbəti hərbi büdcəmizin rekord büdcə olacağını vurğulayan Prezident İlham Əliyev bu rəqəmin beş milyard dollar olacağını, göstərilən məbləğin ən azı 60 faizinin xərclənəcəyini qeyd edib. “Ermənistan silahların əksəriyyətini Qərbdən pulsuz və ya kreditlə almasına, onların təbii ki, silinəcəyinə baxmayaraq, bizimlə silah yarışında tab gətirməyəcək. Hətta bu halda da bizimlə silah yarışında tab gətirməyəcəklər. Onlar İkinci Qarabağ müharibəsinin və 2023-cü ilin sentyabrında keçirilən antiterror əməliyyatının nəticələrini unutmamalıdırlar. Həmçinin başa düşməlidirlər ki, Makron rejiminin, eləcə də ABŞ Dövlət Departamentinin maksimum dəstəyinə baxmayaraq, burada, bu yerdə bizə qarşı növbəti təxribat planlaşdırsalar, onlara heç kim kömək etməyəcək” deyə dövlət başçısı bildirib.
Azərbaycan və Ermənistan arasında sülh sazişinə toxunan Prezident İlham Əliyev sülh sazişi üzrə böyük irəliləyiş əldə edildiyini, bu sənədin 17 maddəsinin 15-nin razılaşdırıldığını deyib. Avropa İttifaqının missiyasının öz formatını dəyişərək sərhəddə təxribatçı binokl diplomatiyası apardığını qeyd edən ölkə rəhbəri bütün bu addımların sülh prosesinə maneçilik törətdiyini, eləcə də dayanıqlı sülhə nail olmaq üçün Ermənistanın mövcud konstitusiyasında müəyyən dəyişikliklər etməli olacağını diqqətə çatdırıb. Prezident İlham Əliyev müsahibəsində eyni zamanda 30 il səmərəsiz fəaliyyət göstərən ATƏT-in Minsk qrupunun ləğv olunmasının zərurətindən də bəhs edib, eləcə də Qərbi Azərbaycan İcmasının reinteqrasiya mərhələsini siyasi gündəmimizdə vacib elementlərdən biri kimi xarakterizə edib. Dövlət başçısı son illər ərzində ölkəmizdə geniş enerji infrastrukturunun yaradıldığını,sübut olunmuş ehtiyatlarımızın 2,6 trilyon kubmetr səviyyəsində proqnozlaşdırıldığını da bildirib ki, bu amil regional və qlobal enerji təhlükəsizliyinin təmin edilməsində mühim rol oynayır. Beynəlxalq tədbirlərə ev sahibliyi etməkdə böyük təcrübəyə malik olan Azərbaycanın COP29 konfransını yüksək səviyyədə təşkil etdiyini bildirən Prezident İlham Əliyev, bu işin öhdəsindən şərəflə gəldiyimizi qeyd edərək strateji qərarların alınmasında Azərbaycanın diplomatiyasının gərgin əməyi olduğunu vurğulayıb.
Əminliklə demək olar ki, Prezident İlham Əliyevin verdiyi bütün müsahibələr beynəlxalq aləmdə Azərbaycanın mövqeyini daha da gücləndirir, ölkəmizi etibarlı tərəfdaş və sülh təşəbbüskarı kimi tanıtmaqda davam edir. Onun çıxışları təkcə Azərbaycanın milli maraqlarının müdafiəsi ilə məhdudlaşmır, həm də qlobal problemlərə ədalətli və balanslı yanaşmanın nümunəsini ortaya qoyur. Bu baxımdan, bu intervü də Azərbaycanın dövlətçilik ideyalarının təbliği, tarixi ədalətin qorunması və dünya miqyasında sülhə və sabitliyə töhfə baxımından xüsusi əhəmiyyət daşıyır. Bu çıxış, Azərbaycanın gələcəyə olan baxışının, gücünün və strateji uzaqgörənliyinin bariz ifadəsidir.
