Azərbaycanın müasir tarixində ölkə Prezidenti cənab İlham Əliyevin adı qızıl hərflərlə yazılmışdır. O, təkcə dövlətin Prezidenti deyil, həm də xalqın lideri, milli birliyin simvolu və Azərbaycanın beynəlxalq aləmdə güclü mövqeyinin təminatçısı rolunda çıxış etmişdir. Müzəffər Ali Baş Komandan kimi İlham Əliyev, Vətən müharibəsində əldə edilən tarixi zəfərin müəllifi olaraq xalqın ürəyində əbədi yer tutmuşdur. Onun rəhbərliyi ilə Azərbaycan həm siyasi-iqtisadi, həm də digər sahələrdə böyük uğurlar qazanmışdır. Prezident İlham Əliyev təkcə siyasi lider kimi deyil, həm də millətini qələbəyə inandıran, xalqın gücünü bir araya gətirən əzmkar bir şəxsiyyət kimi tanınır. Onun müdrik siyasəti, qətiyyəti, uzaqgörənliyi və prinsipiallığı ölkəmizin gələcək nəsillərinə miras qalacaq tarixi bir irsi təmin etmişdir.
İlham Heydər oğlu Əliyev 24 dekabr 1961-ci ildə Bakı şəhərində dünyaya göz açmışdır. Azərbaycanın Ümummilli Lideri Heydər Əliyevin ailəsində böyüyərək uşaqlıqdan yüksək intellektual mühitdə tərbiyə almış və millətinə xidmət etmək əzmi ilə formalaşmışdır. O, 1977-ci ildə Moskva Dövlət Beynəlxalq Münasibətlər İnstitutuna (MDBMİ) daxil olmuş və 1982-ci ildə oranı fərqlənmə diplomu ilə bitirmişdir. Daha sonra elmi fəaliyyətlə məşğul olaraq həmin institutda dərs demişdir. MDBMİ-də təhsil aldığı dövrdə beynəlxalq siyasət və iqtisadiyyat sahələrində geniş biliklərə yiyələnmişdir. Bu biliklər sonradan onun Azərbaycanın beynəlxalq münasibətlər sistemində uğurla fəaliyyət göstərməsində əsaslı rol oynamışdır.
Prezident İlham Əliyev 1994-cü ildən 2003-cü ilə qədər Azərbaycan Respublikası Dövlət Neft Şirkətində (SOCAR) vitse-prezident və birinci vitse-prezident vəzifələrində çalışmışdır. O, Azərbaycanın neft strategiyasının formalaşmasında və həyata keçirilməsində mühüm rol oynamışdır. 1994-cü ildə imzalanmış “Əsrin Müqaviləsi”nin uğurlu icrası onun liderlik bacarıqlarını üzə çıxarmışdır. SOCAR-dakı fəaliyyəti dövründə Prezident İlham Əliyev Azərbaycanın enerji təhlükəsizliyini təmin edən və ölkənin iqtisadi inkişafına təkan verən iri layihələrin müəlliflərindən biri olmuşdur. Məhz onun rəhbərliyi dövründə reallaşan Bakı-Tbilisi-Ceyhan və Bakı-Tbilisi-Ərzurum boru kəmərləri ölkəmizin enerji bazarındakı mövqelərini əhəmiyyətli dərəcədə gücləndirmişdir.
2003-cü ildə Azərbaycan Respublikasının Prezidenti seçildikdən sonra ölkəmiz böyük tərəqqi əldə etmişdir. Dövlət idarəçiliyində şəffaflığın təmin olunması, iqtisadi inkişaf tempinin artırılması, əhalinin sosial rifahının yaxşılaşdırılması, təhsil və səhiyyə sistemlərinin müasirləşdirilməsi onun daxili siyasətinin əsas istiqamətləridir. Prezident İlham Əliyev ölkənin iqtisadi potensialını artırmaq məqsədilə geniş islahatlar həyata keçirmişdir. Dövlət investisiya proqramları çərçivəsində infrastrukturun yenilənməsi, kənd təsərrüfatının inkişafı və qeyri-neft sektorunun gücləndirilməsi istiqamətində mühüm addımlar atılmışdır. Azərbaycanın regionlarında 2004-cü ildən etibarən həyata keçirilən Dövlət Proqramları nəticəsində onminlərlə yeni iş yeri yaradılmış, əhalinin həyat səviyyəsi əhəmiyyətli dərəcədə yüksəlmişdir.
2020-ci ildə İlham Əliyev Müzəffər Ali Baş Komandan kimi Vətən müharibəsinə rəhbərlik edərək Azərbaycanın ərazi bütövlüyünü təmin etdi. 44 gün davam edən bu müharibə Azərbaycan xalqının tarixində ən şanlı səhifələrdən biri oldu. İlham Əliyevin hərbi və siyasi liderliyi nəticəsində işğaldan azad edilən torpaqlarda Azərbaycan bayrağı dalğalanmağa başladı. Şuşanın azad edilməsi müharibənin ən önəmli məqamlarından biri oldu. Bu qələbə ilə xalqımızın qüruru və milli kimliyi bərpa olundu. Prezident İlham Əliyev müharibə dövründə həm də informasiya cəbhəsində uğurla mübarizə apararaq Azərbaycanın haqq səsini dünyaya çatdırdı. Onun səbirli, lakin prinsipial diplomatik fəaliyyəti müharibədən sonrakı dövrdə regionda yeni reallıqların yaranmasına səbəb oldu.
Müharibədən sonra Prezident İlham Əliyevin rəhbərliyi ilə “Böyük Qayıdış” proqramı çərçivəsində işğaldan azad edilmiş ərazilərin yenidən qurulması istiqamətində genişmiqyaslı işlər həyata keçirilir. Qarabağ və Şərqi Zəngəzur iqtisadi rayonları müasir standartlara uyğun yenidən qurulur. Ağdam, Şuşa, Zəngilan, Füzuli və digər şəhərlərdə həyata keçirilən layihələr ölkəmizin iqtisadi və mədəni dirçəlişini təmin edir. “Ağıllı kənd” və “ağıllı şəhər” layihələri Qarabağda yeni həyatın başlanğıcıdır. Həmçinin, beynəlxalq investorların bu regiona cəlb edilməsi regionun dayanıqlı inkişafına xidmət edir.
Prezident İlham Əliyev beynəlxalq arenada Azərbaycanın milli maraqlarını inamla müdafiə edir. Onun təşəbbüsü ilə 2024-cü ildə Bakıda keçirilmiş BMT-nin İqlim Dəyişmələri üzrə COP29 Konfransı Azərbaycanın qlobal iqlim məsələlərindəki liderliyini bir daha nümayiş etdirdi. Qoşulmama Hərəkatına rəhbərlik etdiyi dövrdə Prezident İlham Əliyev pandemiya ilə mübarizə çərçivəsində inkişaf etməkdə olan ölkələrə dəstək göstərilməsini təşviq etdi. Bu, Azərbaycanın beynəlxalq nüfuzunun artmasına mühüm töhfə verdi.
Prezident İlham Əliyev Yeni Azərbaycan Partiyasının (YAP) sədri olaraq partiyanın inkişafını təmin etmiş və onu ölkənin siyasi həyatında aparıcı qüvvəyə çevirmişdir. YAP-ın xalqla sıx əlaqələri və dövlət quruculuğundakı rolu onun liderliyi ilə daha da möhkəmlənmişdir. İlham Əliyev fəaliyyətinə görə bir çox ölkələr tərəfindən yüksək mükafatlara layiq görülmüşdür. O, Türkiyə, Rusiya, Qazaxıstan və digər ölkələrdən ordenlər və medallar almışdır ki, bu da onun dünya siyasətindəki əhəmiyyətini bir daha sübut edir. Prezident İlham Əliyevin liderliyi Azərbaycanı beynəlxalq aləmdə möhkəmləndirən və onun strateji mövqeyini artıran bir çox təşəbbüslərlə yadda qalmışdır. Onun rəhbərliyi ilə ölkəmiz BMT, ATƏT, Avropa Şurası, Türk Dövlətləri Təşkilatı və İslam Əməkdaşlıq Təşkilatı kimi beynəlxalq təşkilatlarla əməkdaşlıq əlaqələrini dərinləşdirmiş, eyni zamanda, Azərbaycan D8 (İnkişaf etməkdə olan ölkələrin iqtisadi əməkdaşlıq təşkilatı) kimi qurumlara üzv seçilərək aktiv tərəfdaşlıq əldə etmişdir.
Xüsusilə Türk Dövlətləri Təşkilatı çərçivəsində Azərbaycan mərkəzi rol oynayır və türk dünyası ilə əlaqələrin inkişafında mühüm vasitəçi kimi çıxış edir. Eyni zamanda, İslam Əməkdaşlıq Təşkilatında ölkəmiz İslam həmrəyliyi prinsiplərini gücləndirərək, Qarabağ münaqişəsi dövründə Azərbaycanın haqlı mövqeyinin dəstəklənməsini təmin etmişdir. Prezident İlham Əliyevin qlobal diplomatiya sahəsində balanslı və uzaqgörən siyasəti nəticəsində Azərbaycan həm regional, həm də qlobal səviyyədə mühüm etibar qazanmışdır. Bu isə ölkənin iqtisadi, siyasi və mədəni sahələrdə daha geniş əməkdaşlıq imkanlarına yol açır.
Prezident İlham Əliyevin rəhbərliyi ilə Azərbaycan regionlarının sosial-iqtisadi inkişafı və ordu quruculuğu sahəsində əldə olunan nailiyyətlər dövlətin prioritet istiqamətləri arasında xüsusi yer tutur. Prezident İlham Əliyev regionların inkişafını təmin etmək üçün bir neçə dövlət proqramı təsdiq etmişdir. 2004-cü ildən etibarən qəbul edilən “Regionların sosial-iqtisadi inkişafı” üzrə dövlət proqramları çərçivəsində infrastrukturun modernləşdirilməsi, yeni iş yerlərinin açılması, sahibkarlığın inkişaf etdirilməsi və kənd təsərrüfatının dəstəklənməsi məqsədilə böyük layihələr həyata keçirilmişdir. Bu proqramların əsas nailiyyətlərindən biri regionlar arasında iqtisadi bərabərsizliyin azaldılması və kənd təsərrüfatı, sənaye və turizm sahələrində əhəmiyyətli artımın əldə olunmasıdır. Belə proqramlar çərçivəsində: müasir yol, su, qaz, elektrik və telekommunikasiya infrastrukturları yaradılmış, yeni məktəblər, xəstəxanalar və digər sosial obyektlər tikilmişdir. Suvarma sistemlərinin yenidən qurulması ilə kənd təsərrüfatı məhsuldarlığı artırılmışdır.
Prezident İlham Əliyev ölkənin təhlükəsizliyini təmin etmək və Azərbaycanın hərbi qüdrətini artırmaq üçün ardıcıl olaraq ordu quruculuğuna xüsusi diqqət yetirmişdir. Ordunun ən müasir silah-sursat və texnologiyalarla təmin edilməsi, hərbi sənaye kompleksinin yaradılması və inkişafı, hərbçilərin sosial müdafiəsinin gücləndirilməsi, onların yaşayış şəraitinin yaxşılaşdırılması üçün hərbi şəhərciklərin və mənzillərin inşası, hərbi təlimlərin və beynəlxalq təcrübə mübadiləsinin təşkili ilə hərbi hazırlığın artırılması bu qəbildən olan addımlar idi. Azərbaycan Ordusunun 2020-ci ildə 44 günlük Vətən müharibəsində və 2023-cü ilin Antitterror əməliyyatlarında qazandığı tarixi qələbələr məhz bu siyasətin nəticəsinin göstəricisi olmuşdur. Prezident İlham Əliyevin rəhbərliyi ilə aparılan ardıcıl islahatlar Azərbaycan Ordusunun regionun ən güclü ordularından birinə çevrilməsinə səbəb olmuşdur. Bu strategiyalar nəticəsində həm regionların inkişafı, həm də ölkənin hərbi gücü daha da möhkəmlənmiş və Azərbaycan regionda sabitlik və inkişafın təminatçısı kimi tanınmışdır.
Prezident İlham Əliyev, Azərbaycanın Ümummilli Lideri Heydər Əliyevin siyasi irsinin layiqli davamçısı kimi xalqımızın yaddaşında əbədi iz buraxmışdır. Heydər Əliyev tərəfindən əsası qoyulan dövlətçilik prinsiplərini qoruyaraq İlham Əliyev müasir dövrün çağırışlarına uyğun, yenilikçi və qətiyyətli siyasət yürütməkdədir. O, Heydər Əliyev irsinin ən mühüm dəyərlərini – dövlət müstəqilliyi, milli birliyə xidmət və xalqın rifahını daim prioritet olaraq qəbul etmişdir. Ulu Öndər Heydər Əliyevin uzaqgörən siyasəti nəticəsində güclü dövlətçilik təməlləri qoyuldu. Prezident İlham Əliyev isə Ümummilli Liderin bu mirasını qoruyaraq, Azərbaycanın müstəqilliyini daha da möhkəmləndirdi və dövlətçiliyimizi beynəlxalq arenada gücləndirdi. Prezident İlham Əliyev müasir Azərbaycanın simasını müəyyən edən böyük liderdir. Əminliklə demək olar ki, bundan sonra da onun rəhbərliyi ilə Azərbaycan öz dayanıqlı inkişafını təmin edəcək, milli maraqlar qorunacaq və xalqın rifahı daha da yüksələcəkdir.
