23 dekabr 1995-ci il tarixdə Ordubad rayonunun Kilit kəndində şəhidlik zirvəsinə ucalan İsmayılov Orxan Baba oğlu və Qədimov Pənah Salman oğlunun anım tədbirləri keçirilib. Behrud və Düylün kəndlərində keçirilən tədbirlərdə Ordubad Rayon İcra Hakimiyyəti başçısının müavini, İcra Hakimiyyətinin, Sosial Xidmətlər Agentliyinin, Polis şöbəsinin, Səfərbərlik xidmətinin, Biləv, Behrud və Düylün kəndlərində fəaliyyət göstərən müəssisələrin əməkdaşları və ictimaiyyət nümayəndələri iştirak ediblər. Əvvəlcə tədbir iştirakçıları tərəfindən şəhidlərin məzarları ziyarət olunub, üzərilərinə gül dəstələri düzülüb. Şəhidlərimizin ruhuna dualar oxunub, çıxışlar dinlənilib.
Çıxışlarda müstəqilliyimizin qorunması, ölkəmizin ərazi bütövlüyünün müdafiəsi, suverenliyimizin bərpa olunması uğrunda canlarından keçən qəhrəman şəhidlərimizin xatirəsinin daim ehtiramla yad edildiyi vurğulanıb, şəhid ailələrinə mənəvi dəstək ifadə olunub.
Şəhid ailələri dövlətimiz tərəfindən göstərilən hörmət və ehtirama, diqqət və qayğıya görə minnətdarlıq ediblər.
