Dekabr ayının 29-da Ordubad rayon İnternat tam orta məktəbdə 31 Dekabr - Dünya Azərbaycanlılarının Həmrəyliyi Günü və Yeni il münasibətilə tədbir keçirilib. Tədbirdə Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsinin müavini Samir Seyidəhmədli çıxış edərək şagirdləri əlamətdar günlər münasibətilə təbrik edib, onlara təhsillərində və gələcək həyatlarında uğurlar arzulayıb.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsinin müavini Samir Seyidəhmədli, Ordubad rayon İcra Hakimiyyətinin başçısı Rəcəb Rəhimli, Azərbaycan Həmkarlar İttifaqları Konfederasiyasının sədr müavini, Naxçıvan Muxtar Respublikası Həmkarlar İttifaqları Şurasının sədri Qəzənfər Abdullayev, Naxçıvan Muxtar Respublikası təhsil nazirinin müavini, nazir vəzifələrinin müvəqqəti icraçısı Elxan Nəcəfov yaxın zamanda Naxçıvanda yaradılacaq Turizm Bloggerləri Assosiasiyası üzvlərinin layihəsi çərçivəsində şagirdlərin Naxçıvan şəhərində təşkil olunan “Snowfest – Qış festivalı”ndakı “Dilək yolkası”nda əks olunan arzularına uyğun hədiyyələri təqdim ediblər. Ümumilikdə, 60 uşağın yeni il diləyi gerçəkləşdirilib.
Sonra uşaqlarla xatirə fotosu çəkdirilib.
Qeyd edək ki, yaxın zamanda Naxçıvanda yaradılacaq Turizm Bloggerləri Assosiasiyasının üzvləri Ordubad şəhər tam orta internat məktəbində olub və şagirdlərin diləklərini yazaraq muxtar respublikada ilk dəfə təşkil olunan “Snowfest – Qış festivalı”nda bəzədilmiş “Dilək yolkası”dan asıblar. Dekabrın 25-də Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli, dövlət və hökumət nümayəndələri Naxçıvan şəhərinin Heydər Əliyev prospektində təşkil olunan “Snowfest - Qış festivalı”na hazırlığın vəziyyəti ilə maraqlanan zaman dilək ağacından asılan arzularla tanış olub, uşaqların arzularının gerçəkləşdiriləcəyi bildirilmişdi.
