Novruz bayramı xalqımız üçün təkcə təbiətin oyanışı, yeni günün müjdəsi deyil, həm də milli həmrəylik və mənəvi dəyərlərin təntənəsidir. Əsrlərdir ki, Novruz insanları dostluğa, barışa, birlik və həmrəyliyə çağırır. Azərbaycan xalqı üçün bu bayram həm də tarixin, adət-ənənələrin və milli kimliyin qorunub saxlanmasının bir rəmzidir. Ulu Öndər Heydər Əliyevin dediyi kimi, Novruz bayramı elə bir gündür ki, burada siyasi baxışlardan, fikir ayrılıqlarından asılı olmayaraq hər kəs bayram edir, insanlar kin-küdurəti unudur, küsülülər barışır, ziddiyyətlər aradan qalxır. Bu bayramın fəlsəfəsi məhz birlik və dostluq üzərində qurulub.
Bu gün biz Novruz bayramını tamamilə yeni bir ruhda qeyd edirik. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu doğma torpaqlarımızı işğaldan azad etdi. Artıq biz Novruzu doğma Qarabağda–Şuşada, Xankəndidə, Cıdır düzündə qeyd edirik. Hər bayram tonqalı azad edilən yeni bir şəhərdə qalanır və bu, xalqımızın tarixi Zəfərinin rəmzinə çevrilib. Bu müqəddəs bayramın dünyaya tanıdılmasında Azərbaycanın Birinci vitse-prezidenti Mehriban Əliyevanın böyük rolu vardır. Onun təşəbbüsü ilə Novruz UNESCO tərəfindən Qeyri-Maddi Mədəni İrsin Reprezentativ Siyahısına daxil edilib. Eyni zamanda, BMT Baş Assambleyasının qərarı ilə 21 mart “Beynəlxalq Novruz Günü” elan olunub. Bu, Novruzun yalnız türk xalqlarının deyil, ümumilikdə bəşəriyyətin mənəvi dəyəri olduğunu bir daha sübut edir. Novruz bayramı təkcə süfrələrdə bolluğun, qapılarda mehribanlığın deyil, həm də təbiətə qayğının ifadəsidir. 2007-ci ildən Mehriban xanım Əliyevanın təşəbbüsü ilə “Hərəmiz bir ağac əkək” kampaniyası həyata keçirilmişdir. Bu kampaniya çərçivəsində ölkə üzrə yüz minlərlə ağac əkilib, ekoloji tarazlığın qorunmasına töhfə verilib.
Novruz bayramı Azərbaycan xalqının zəngin mədəniyyətini, folklorunu özündə yaşadır. Papaqatmaq, qulaq falı, tonqaldan tullanmaq, yumurta döyüşdürmək kimi adətlər əsrlərdir qorunub saxlanılır. Bayram süfrəsinin bəzəyi olan səməni bolluq və firavanlığın simvoludur. Xalqımızın dərin fəlsəfi baxışları ilə formalaşmış bu adətlər bu gün də yaşadılır və gələcək nəsillərə ötürülür. Novruzun əsas xüsusiyyətlərindən biri dörd çərşənbənin – Su, Od, Yel və Torpaq çərşənbələrinin qeyd olunmasıdır. Su çərşənbəsi təmizliyin və başlanğıcın, Od çərşənbəsi həyat enerjisinin, Yel çərşənbəsi ruhun, Torpaq çərşənbəsi isə bolluğun rəmzidir. Bu çərşənbələr qədim inanclarımızın, xalq dünyagörüşümüzün, təbiətə olan münasibətimizin əksidir.
Novruzun mahiyyəti sülh və humanizm dəyərlərinə əsaslanır. Bayramın fəlsəfəsində insanlar arasında dostluğun möhkəmlənməsi, bir-birinə ehtiram və qayğı göstərilməsi dayanır. Novruz günlərində küsülülər barışır, insanlar bir-birini ziyarət edir, evlərdə bayram süfrələri açılır. Azərbaycan xalqının qonaqpərvərliyi, mehribanlığı bu bayramda özünün ən yüksək səviyyədə təzahürünü tapır. Hər il Novruz bayramı ərəfəsində Prezident İlham Əliyev tərəfindən imzalanan əfv sərəncamları Azərbaycan dövlətinin humanist siyasətinin bariz nümunəsidir. Bu, Novruzun humanist mahiyyətinə, bağışlanma və mərhəmət prinsiplərinə uyğun addımdır.
Bu gün biz Novruzu yeni ruhda – qalib xalq kimi qeyd edirik. Qırx dörd günlük Vətən müharibəsindən sonra Qarabağda və Şərqi Zəngəzurda genişmiqyaslı quruculuq işləri aparılır. İşğaldan azad edilmiş torpaqlarda yollar, məktəblər, xəstəxanalar tikilir, yeni yaşayış məntəqələri salınır. Artıq keçmiş məcburi köçkünlər öz dədə-baba yurdlarına qayıdır, həyat yenidən canlanır.
Xankəndidə yandırılan Novruz tonqalı bütün Azərbaycan xalqı üçün birlik və həmrəylik rəmzidir. Tarixi torpaqlarımızda yenidən baharın nəfəsini duymaq, bayramı öz doğma yurdumuzda qeyd etmək xalqımızın ən böyük qələbəsidir. Qoy, Novruz hər evə ruzi-bərəkət, firavanlıq və sevinc gətirsin. Bayramınız mübarək!
