13 mart 2025-ci il tarixində Ordubad Rayon İcra Hakimiyyətində dövlət qulluqçuları üçün "Öyrənən təşkilatlar" (learning organization) mövzusunda təlim təşkil edilib. Təlimin məqsədi təşkilat daxilində idarəetmənin təkmilləşdirilməsi, eləcə də rəhbər və məsul şəxslərin uzunmüddətli planlaşdırma, problem həlli və qərar qəbul etmə sahəsində strateji düşünmə bacarıqlarının inkişaf etdirilməsi olub.
Təlimdə əvvəlcə müasir dövrün sürətlə dəyişən sosial, iqtisadi və texnoloji reallıqları, beynəlxalq rəqabət və qeyri-müəyyənlik şəraitində təşkilatların qarşılaşdığı çağırışlar barədə məlumat verilib. Daha sonra dəyişən idarəetmə yanaşmaları – mexaniki sistem paradiqması (gündəlik vəzifələr, formal sistemlər, qatı mədəniyyət, rəqabətə əsaslanan strategiyalar) və təbii sistem paradiqması (gücləndirilmiş tapşırıqlar, uyğunlaşan mədəniyyət, bölüşdürülən məlumat və birgə strategiyalar) arasındakı fərqlər izah edilib.
Öyrənən təşkilatların mahiyyəti izah edilərək vurğulanıb ki, belə təşkilatlar davamlı şəkildə yaşadıqları təcrübələrdən nəticə çıxarır, işçilərin inkişafına xüsusi diqqət yetirir, dəyişən mühit şərtlərinə uyğunlaşır və özünü daim yeniləyir. Bu təşkilatların əsas xüsusiyyətləri arasında sistem düşüncəsi, zehni modellər, fərdi ustalıq, kollektiv öyrənmə və ortaq vizionun bölüşdürülməsi xüsusi qeyd edilib.
Təlimdə öyrənən təşkilatın formalaşdırılması yollarına da toxunulub. Məlumatın təşkilat daxilində sürətli və səmərəli yayılmasının, kollektiv təcrübələrdən öyrənmənin, yeni yanaşmaların tətbiqinin və sistematik problem həll etmə metodlarının əhəmiyyəti vurğulanıb. Həmçinin davamlı öyrənmə, dəstəkləyici liderlik, dialoq və araşdırma, sistemlərarası əlaqələr və kollektiv öyrənmənin vacibliyi izah edilib.
Təlimdə iştirakçılara öyrənən təşkilatlarda liderliyin rolu barədə ətraflı məlumat verilib. Bildirilib ki, belə təşkilatlarda liderlər yalnız idarəedici deyil, həm də öyrədici funksiyanı yerinə yetirirlər. Onların effektivliyi isə nəyi bildiklərinə deyil, necə öyrəndiklərinə və başqalarına necə öyrətdiklərinə görə qiymətləndirilir.
Vurğulanıb ki, öyrənən təşkilat modeli çevik qərar qəbul etməyə, dəyişən mühitə sürətlə uyğunlaşmağa və yeni məhsul və xidmətlər yaratmaqla yanaşı, mövcud prosesləri təkmilləşdirməyə imkan verir. Bu yanaşma digər təşkilatlardan öyrənmə imkanlarını genişləndirir, strateji dəyişikliklərin daha səmərəli həyata keçirilməsinə şərait yaradır və nəticədə təşkilatın bütün səviyyələrində davamlı inkişafı təmin edir.
Sonda mövzu ətrafında müzakirələr aparılıb və təlim iştirakçılarının sualları cavablandırılıb.
