Ordubad Rayon İcra Hakimiyyətinin başçısı Rəcəb Rəhimli tərəfindən 2025-ci il aprelin 4-də Sabirkənd kənd İnzibati Ərazi Dairəsinin tərkibinə daxil olan Baş Dizə kəndində səyyar qəbul keçirilib. Azərbaycan Respublikasının Prezidenti cənab İlham Əliyevin tapşırıq və tövsiyələrinə əsasən, vətəndaşların müraciətlərini birbaşa dinləmək, onların arzu və təkliflərini yerində öyrənmək, qaldırılan məsələlərin operativ və səmərəli həllinə nail olmaq məqsədilə təşkil olunan görüşdə İcra Hakimiyyətinin məsul əməkdaşları, aidiyyəti xidmət təşkilatlarının rəhbərləri, icra nümayəndəsi və bələdiyyə sədri iştirak ediblər.
Görüşdə çıxış edən icra başçısı, Prezident İlham Əliyevin rəhbərliyi ilə ölkədə genişmiqyaslı sosial-iqtisadi islahatların həyata keçirildiyini, bu islahatların xalqın rifah halının yüksəldilməsinə və regionların davamlı inkişafına əhəmiyyətli töhfələr verdiyini bildirib. Vurğulanıb ki, respublika üzrə reallaşdırılan infrastruktur layihələri çərçivəsində Ordubad rayonunda da əsaslı addımlar atılır. Yaxın gələcəkdə rayon ərazisində müxtəlif sahələr üzrə mühüm işlər həyata keçiriləcək, müasir tələblərə cavab verən sosial infrastrukturun yaradılması təmin ediləcəkdir.
İcra başçısı 44 günlük Vətən müharibəsi və lokal Antiterror tədbirləri nəticəsində ölkəmizin ərazi bütövlüyünün və konstitusion suverenliyinin tam şəkildə bərpa olunduğunu vurğulayıb. Bildirilib ki, Müzəffər Ali Baş Komandan cənab İlham Əliyevin rəhbərliyi ilə Azərbaycan xalqı tarixinin ən şanlı səhifələrindən birini yazaraq işğalda olan torpaqlarını azad etmişdir. Hazırda Qarabağ və Şərqi Zəngəzur iqtisadi rayonlarında quruculuq işləri həyata keçirilir, məcburi köçkünlərin doğma yurdlarına qayıdışı üçün hərtərəfli şərait yaradılır. Çıxış zamanı Almaniya Federativ Respublikası Prezidentinin Azərbaycana son rəsmi səfəri, eləcə də səfər çərçivəsində keçirilən yüksək səviyyəli görüşlər barədə fikir bildirilib. Qeyd olunub ki, bu səfər Azərbaycanın dünyada yüksələn nüfüzunu, eləcə də etibarlı və güclü tərəfdaş kimi mövqeyini bir daha təsdiq edir.
Zəngəzur dəhlizinin regional və beynəlxalq əhəmiyyəti barədə danışan icra başçısı, Prezident İlham Əliyevin “Zəngəzur dəhlizi açılmalıdır və açılacaqdır” bəyanatını xatırladaraq, bu dəhlizin region ölkələri və Azərbaycanın iqtisadi əlaqələri üçün yeni imkanlar yaradacağını vurğulayıb. Qeyd olunub ki, dəhlizin istifadəyə verilməsi ölkəmizin nəqliyyat-logistika mərkəzinə çevrilməsinə mühüm töhfə verəcək.
İcra başçısı həmçinin Qars–Naxçıvan dəmir yolu xətti və İğdır–Naxçıvan qaz kəməri layihələri barədə məlumat verərək bildirib ki, bu layihələr regionda nəqliyyat və enerji sahəsində əməkdaşlığın genişlənməsinə xidmət edir. Qars–Naxçıvan dəmir yolu xətti iqtisadi əlaqələrin inkişafına və ticarət həcminin artmasına səbəb olacaq, İğdır–Naxçıvan qaz xətti isə enerji təhlükəsizliyinin təmin olunmasında mühüm rol oynayacaqdır.
Görüşdə “2023–2027-ci illərdə Naxçıvan Muxtar Respublikasının sosial-iqtisadi inkişafı Dövlət Proqramı” çərçivəsində rayonda həyata keçiriləcək layihələr barədə də danışılıb. Yol infrastrukturunun yenilənməsi və məşğulluq imkanlarının artırılması istiqamətində nəzərdə tutulan tədbirlər barədə ətraflı məlumat verilib. Bildirilib ki, bu proqram regionun sosial-iqtisadi inkişafına təkan verəcək və müxtəlif sahələrin dinamik inkişafını təmin edəcəkdir. Rayon ərazisində mədən sənayesinin yenidən dirçəldilməsi, eləcə də ipəkçilik və konserv istehsalı müəssisələrinin fəaliyyətinin bərpası istiqamətində görüləcək tədbirlər də qeyd olunub.
Görüş zamanı sakinlərin kəndin ümumi problemləri ilə bağlı müraciətləri dinlənilib. Səsləndirilən məsələlər – məşğulluq, su, yol, torpaq, qaz və digər sahələrlə bağlı problemlər məsul şəxslərin iştirakı ilə yerində araşdırılıb və həlli üçün konkret tədbirlər müəyyənləşdirilib. Həlli vaxt tələb edən məsələlər isə nəzarətə götürülərək aidiyyəti qurumlara müvafiq tapşırıqlar verilib. Sakinlər göstərilən diqqətə görə minnətdarlıqlarını bildirərək, ölkə rəhbərliyinə təşəkkürlərini ifadə ediblər.
