Azərbaycan Respublikasının Prezidenti cənab İlham Əliyevin tapşırıq və tövsiyələrinə uyğun olaraq vətəndaşların problemlərinin yerində araşdırılması və operativ şəkildə həllinə nail olunması məqsədilə Ordubad Rayon İcra Hakimiyyətinin başçısı Rəcəb Rəhimli tərəfindən 14 mart 2025-ci il tarixində Kələki kəndində səyyar qəbul keçirilib. Görüşdə İcra Hakimiyyətinin məsul əməkdaşları, xidməti təşkilatların rəhbərləri və müvafiq kəndin icra nümayəndəsi iştirak ediblər.
Qəbulu giriş nitqi ilə açan rayon icra hakimiyyətinin başçısı ölkəmizdə həyata keçirilən sosial-iqtisadi islahatlar barədə geniş məlumat verib. O, Prezident İlham Əliyevin rəhbərliyi ilə aparılan islahatların ölkənin inkişafına böyük töhfə verdiyini və vətəndaşların rifah halının yüksəldilməsinə xidmət etdiyini vurğulayıb. Çıxışda həmçinin, 44 günlük Vətən müharibəsi və antiterror əməliyyatları nəticəsində torpaqlarımızın işğaldan azad olunması, habelə işğaldan azad edilmiş ərazilərdə genişmiqyaslı quruculuq və bərpa işlərinin sürətlə davam etdiyi bildirilib və dövlətin bu istiqamətdə həyata keçirdiyi layihələrdən bəhs edilib. Azərbaycanın qlobal arenada artan nüfuzu vurğulanaraq, ölkəmizin bugün dünyanın güclü dövlətlərindən birinə çevrildiyi diqqətə çatdırılıb.
İcra başçısı, dünyada baş verən qlobal və geosiyasi proseslərə toxunaraq, ölkəmizin regionda və beynəlxalq səviyyədə mövqelərini möhkəmləndirdiyini və baş verən hadisələrə təsir imkanlarının artdığını qeyd edib. O, bəzi Qərb dairələrinin ölkəmizə qarşı yeritdiyi ikiüzlü və riyakar siyasətə toxunaraq, Azərbaycanın hərbi və iqtisadi qüdrətinin bu cür təzyiqlərə qarşı durmaq iqtidarında olduğunu vurğulayıb. Türk dövlətləri ilə əlaqələrin möhkəmlənməsinin əhəmiyyətini qeyd edən icra başçısı, Prezident İlham Əliyevin "Bizim başqa ailəmiz yoxdur, ailəmiz Türk dünyasıdır" bəyanatını xatırladıb, eləcə də Azərbaycanın Türk dünyası ilə əməkdaşlığının prioritet istiqamətlərdən biri olduğunu diqqətə çatdırıb. O, eyni zamanda Zəngəzur dəhlizinin strateji əhəmiyyətini vurğulayaraq, bu dəhlizin regionun iqtisadi və nəqliyyat əlaqələrinin inkişafına verəcəyi töhfələri qeyd edib. Çıxışda dövlət başçısı tərəfindən Qarabağ, Şərqi Zəngəzur və Naxçıvan iqtisadi rayonlarının vahid bir iqtisadi sistemin parçası kimi nəzərdə tutulduğu vurğulanaraq, bu ərazilərin perspektivdə türk dünyasının da daxil olduğu və nəhəng nəqliyyat dəhlizlərinin keçəcəyi marşrutlar olaraq böyük əhəmiyyət kəsb edəcəyi bildirilib. Həmçinin Azərbaycan və Türkiyə prezidentlərinin iştirakı ilə istifadəyə verilən İğdır-Naxçıvan qaz kəmərinin regionun enerji təchizatında sabitliyin və enerji təhlükəsizliyinin təmin edilməsində mühim rol oynayacağı və əhalinin dayanıqlı enerji resursları ilə təminatına əhəmiyyətli töhfə verəcəyi vurğulanıb.
Ordubad Rayon İcra Hakimiyyətinin başçısı Rəcəb Rəhimli "2023-2027-ci illərdə Naxçıvan Muxtar Respublikasının sosial-iqtisadi inkişafı Dövlət Proqramı" çərçivəsində görülən işlər haqqında danışaraq, bu ildən etibarən nəzərdə tutulan tədbirlərin icrasının daha da sürətlənəcəyini bildirib. Rayon ərazisində yol infrastrukturunun bərpası istiqamətində və digər sahələrdə əsaslı işlərin görüləcəyi, Ordubadın gələcəkdə əsas turizm mərkəzlərindən birinə çevrilməsi üçün müvafiq addımların atılacağı yerli sakinlərin diqqətinə çatdırılıb. Eyni zamanda, rayonun qədim sənətkarlıq ənənələrini dirçəltmək və tarixi simasını bərpa etmək məqsədilə “Sərşəhər” məscidi, “Mədrəsə” binası və “Ərbabın evi” adlanan tikililərin hərtərəfli bərpa ediləcəyi, bu işlərin şəhərin yeni hazırlanan baş planına uyğun həyata keçiriləcəyi bildirilib.
Daha sonra sakinlərlə kəndin ümumi problemləri müzakirə edilib. Məşğulluq, torpaq, su, yol, sosial yardım, qaz xəttinin yerinin dəyişdirilməsi və digər məsələlərlə bağlı səsləndirilən məsələlər məsul şəxslərin iştirakı ilə yerindəcə araşdırılaraq, həlli ilə bağlı tədbirlər müəyyənləşdirilib. Həlli vaxt tələb edən məsələlər isə nəzarətə götürülməklə aidiyyəti təşkilat rəhbərlərinə müvafiq tapşırıqlar verilib. Sakinlər rayon ərazisində vətəndaşların qəbulu və müraciətlərinə baxılması üçün rahat və əlverişli şərait yaradılmasından razılıqlarını ifadə edərək, göstərilən diqqət və qayğıya görə ölkə rəhbərliyinə öz minnətdarlıqlarını bildiriblər.
