Ordubad Rayon İcra Hakimiyyətinin başçısı Üstüpü kəndində səyyar qəbul keçirib

Azərbaycan Respublikasının Prezidenti cənab İlham Əliyevin tapşırıq və tövsiyələrinə uyğun olaraq vətəndaş məmnunluğunun təmin edilməsi, müraciətlərin yerində araşdırılması və mövcud problemlərin birbaşa həlli məqsədilə Ordubad Rayon İcra Hakimiyyətinin başçısı Rəcəb Rəhimli tərəfindən 07 mart 2025-ci il tarixdə Üstüpü kəndində səyyar qəbul keçirilib. Görüşdə İcra Hakimiyyətinin məsul əməkdaşları, xidməti təşkilatların rəhbərləri, müvafiq kəndin icra nümayəndəsi və bələdiyyə sədri iştirak ediblər.

Ordubad Rayon İcra Hakimiyyətinin başçısı Rəcəb Rəhimli tədbir iştirakçılarını salamlayaraq ölkədə həyata keçirilən genişmiqyaslı quruculuq və abadlıq işləri, həmçinin sosial-iqtisadi islahatlar barədə ətraflı məlumat verib. O, son illərdə ölkə rəhbərliyinin diqqət və qayğısı nəticəsində sosial rifahın yaxşılaşdırılması, infrastruktur layihələrinin reallaşdırılması və regionların inkişafı istiqamətində mühüm addımlar atıldığını vurğulayıb, aparılan davamlı inkişaf siyasətinin vətəndaşların rifahının yüksəldilməsinə yönəldiyini qeyd edib. Çıxışda həmçinin  Azərbaycanın Vətən müharibəsində əldə etdiyi qələbənin ölkəmizin hərbi və siyasi mövqeyini gücləndirdiyi, eləcə də dünya ictimaiyyətində ölkəmizə olan etimadı artırdığı bildirilib.

 İcra başçısı Azərbaycan və Türkiyə prezidentlərinin iştirakı ilə istifadəyə verilən İğdır-Naxçıvan qaz kəmərinin regionun enerji təchizatında sabitliyin və enerji təhlükəsizliyinin təmin edilməsində mühüm rol oynayacağını, əhalinin dayanıqlı enerji resursları ilə təminatına əhəmiyyətli töhfə verəcəyini diqqətə çatdırıb. Yaxın perspektivdə reallaşması gözlənilən Zəngəzur dəhlizi layihəsinin ölkəmizin Türk dünyası ilə mədəni-siyasi, sosial-iqtisadi əlaqələrini gücləndirəcəyi, bölgədə nəqliyyat əlaqələrinin intensivləşməsi və turizm imkanlarının artması sayəsində Ordubad rayonunun inkişafına mühüm təsir göstərəcəyi qeyd olunub.

Ordubad Rayon İcra Hakimiyyətinin başçısı Rəcəb Rəhimli “2023-2027-ci illərdə Naxçıvan Muxtar Respublikasının sosial-iqtisadi inkişafı Dövlət Proqramı” haqqında da məlumat verib. Dövlət proqramında nəzərdə tutulan tədbirlərin icrasının həyata keçirilməsi üçün müvafiq addımların atıldığını, 2025-ci ildən etibarən işlərin daha da sürətlənəcəyini bildirib. Rayonun yeraltı sərvətlərinin istifadəsi, xüsusən də mədən sənayesinin yenidən dirçəldilməsi istiqamətində işlərə başlanıldığı, yaxın gələcəkdə xalçaçılıq-ipəkçilik və konserv məhsulları istehsal edən müəssisələrin yaradılmasının planlaşdırıldığı diqqətə çatdırılıb.

  Görüşdə həmçinin “Ordubad” Dövlət Tarix-Mədəniyyət Qoruğunun yaradılması haqqında Prezident İlham Əliyevin 21 fevral 2024-cü il tarixli Sərəncamı ilə gələcəkdə rayonun bölgədə əsas turizm mərkəzlərindən birinə çevriləcəyi, bu məqsədlə də ilk olaraq yeni Hotel tikintisinin başlanması yönündə fəaliyyətin icra olunduğu  bildirilib. Ordubadın qədim sənətkarlıq ənənələrini dirçəltmək və tarixi simasını bərpa etmək məqsədilə “Sərşəhər” məscidinin, “Mədrəsə” binasının və “Ərbabın evi” adlanan qədim tikilinin hərtərəfli restavrasiya olunacağı, bu işlərin şəhərin yeni hazırlanan baş planına uyğun həyata keçiriləcəyi iştirakçıların diqqətinə çatdırılıb.

Daha sonra sakinlərlə kəndin ümumi problemləri müzakirə edilib, məşğulluq, içməli su, yol infrastrukturu, ekologiya və sair problemləri ilə bağlı səsləndirdikləri məsələlər məsul şəxslərin iştirakı ilə yerindəcə araşdırılaraq həlli ilə bağlı tədbirlər müəyyənləşdirilib. Həlli vaxt tələb edən məsələlər isə nəzarətə götürülməklə aidiyyəti təşkilat rəhbərlərinə müvafiq tapşırıqlar verilib. Sakinlər rayon ərazisində vətəndaşların qəbulu və müraciətlərinə baxılması üçün rahat və əlverişli şərait yaradılmasından razılıqlarını ifadə edərək, göstərilən diqqət və qayğıya görə ölkə rəhbərliyinə öz minnətdarlıqlarını bildiriblər.