Ordubad rayonunun Azadkənd kəndində “Konstitusiya və Suverenlik ili” çərçivəsində “Qohum və erkən nikahlar sağlam cəmiyyətin formalaşması üçün əsas maneələrdən biridir” mövzusunda maarifləndirici tədbir keçirilib. Tədbir Ordubad Rayon İcra Hakimiyyəti və Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə baş tutub.
Tədbiri giriş sözü ilə açan Ordubad Rayon İcra Hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Abbas Məmmədli erkən və qohum nikahlarının cəmiyyətə, xüsusilə də ailələrin rifahına və uşaqların inkişafına mənfi təsirlərindən danışıb. Bildirilib ki, bu cür nikahlar ailə institutu üçün ciddi təhlükə yaradır və sağlam cəmiyyətin formalaşmasına mane olur.
Daha sonra Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin Ailə, qadın problemləri və gender məsələləri şöbəsinin baş məsləhətçisi Firuzə Hüseynova geniş məruzə ilə çıxış edib. O, erkən nikahların yaratdığı hüquqi, psixoloji və sosial problemləri ətraflı şəkildə izah edərək, bu cür halların qarşısının alınması üçün həyata keçirilən tədbirlər və maarifləndirici işlər barədə məlumat verib. Firuzə Hüseynova onu da vurğulayıb ki, cəmiyyətin sağlam inkişafı üçün ailə institutunun möhkəmləndirilməsi və gənclərin təhsilə cəlb olunması vacib şərtlərdəndir.
Tədbirdə mövzuya dair təqdimat nümayiş etdirilib və iştirakçılar arasında müzakirələr aparılıb.
