25 fevral 2017-ci il tarixdə Xocavənd rayonu ərazisində kəşfiyyat tapşırığını yerinə yetirərkən şəhidlik zirvəsinə ucalmış Haşımlı Tural Əbdül oğlunun anım günü ilə əlaqədar olaraq Ordubad şəhər Şəhidlər Xiyabanında şəhidin məzarı ziyarət olunub, önünə gül dəstələri düzülərək əziz xatirəsi ehtiramla yad edilib.
Tədbirdə Ordubad Rayon İcra Hakimiyyəti başçısının müavini, İcra Hakimiyyətinin, Sosial Xidmətlər Agentliyinin, Polis şöbəsinin, Səfərbərlik və Hərbi Xidmətə Çağırış üzrə Dövlət Xidmətinin əməkdaşları, 1 saylı tam orta məktəbin kollektivi və ictimaiyyət nümayəndələri iştirak ediblər. Şəhidimizin ruhuna dualar oxunub, çıxışlar dinlənilib.
Tədbir iştirakçıları çıxışlarında Vətən uğrunda canından keçən Tural Haşımlının göstərdiyi qəhrəmanlıq və şücaətlərdən danışıb, onun əziz xatirəsinin xalqımızın yaddaşında əbədi yaşayacağını vurğulayıblar. Həmçinin Qarabağ müharibəsi şəhidlərinin qəhrəmanlıqları gənc nəsil üçün vətənpərvərlik nümunəsi olduğu qeyd olunub.
Daha sonra orta məktəb şagirdləri tərəfindən şəhidlərin xatirəsinə həsr olunmuş vətənpərvərlik mövzusunda şeirlər səsləndirilib.
