Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı çərçivəsində Ordubad rayonunun Aza və Darkənd kəndlərində yol infrastrukturunun yenidən qurulmasına başlanılıb. Layihə kəndlərin sosial-iqtisadi inkişafını sürətləndirmək, sakinlərin rahatlığını təmin etmək və yol-nəqliyyat infrastrukturunu müasirləşdirmək məqsədi daşıyır. Tikinti işləri "Naxçıvan Yol Təmir-Tikinti" MMC tərəfindən həyata keçirilir.
Hazırda kənddaxili yolların əsaslı şəkildə bərpasına başlanılıb. Relyefə uyğun düzləndirmə işləri aparılır, torpaq layının lazımi qalınlıqda yerləşdirilməsi üçün hamarlama işləri görülür. Bundan əlavə, nəqliyyat vasitələrinin rahat hərəkətini təmin etmək üçün yol örtüyünün eni genişləndirilir, çınqıl və digər materiallardan istifadə olunaraq yol yatağı möhkəmləndirilir.
Tikinti işlərinin növbəti mərhələlərində yolun əsas laylarının formalaşdırılması, asfalt örtüyünün çəkilməsi və yol infrastrukturunun tam şəkildə istifadəyə verilməsi nəzərdə tutulur. Layihə başa çatdıqdan sonra Aza və Darkənd kəndlərinin sakinləri təhlükəsiz, rahat və müasir yol infrastrukturundan istifadə etmək imkanı əldə edəcəklər.
