Ordubadda “Konstitusiya və suverenlik ili” çərçivəsində tədbir keçirilib

  Fevralın 27-də Ordubad Rayon İcra Hakimiyyətinin təşkilatçılığı ilə “Konstitusiya və suverenlik ili” çərçivəsində “İnsanların hüquq və azadlıqlarının qorunması” mövzusunda tədbir keçirilib. Tədbirdə Ordubad Rayon İcra Hakimiyyətinin, hüquq-mühafizə orqanlarının, idarə və təşkilatların əməkdaşları iştirak ediblər.

      Tədbir iştirakçıları əvvəlcə Ümummilli Lider Heydər Əliyevin və Azərbaycanın ərazi bütövlüyü, müstəqilliyi uğrunda canlarından keçən şəhidlərin əziz xatirəsini bir dəqiqəlik sükutla yad ediblər.

      Ordubad Rayon İcra Hakimiyyəti başçısının müavini, İctimai-siyasi və humanitar məsələlər üzrə iş şöbəsinin müdiri Fərqanə Hüseynli tədbiri açaraq, iştirakçıları salamlayıb və insan hüquq və azadlıqlarının qorunmasının dövlət siyasətinin prioritet istiqamətlərindən biri olduğunu vurğulayıb. Bildirilib ki, 2025-ci ilin ölkəmizdə “Konstitusiya və suverenlik ili” elan edilməsi hüquqi dövlət quruculuğunun inkişafına, vətəndaş hüquqlarının daha da möhkəmləndirilməsinə xidmət edir.

       Daha sonra Ordubad Rayon İcra Hakimiyyətinin Hüquq şöbəsinin müdiri Emin Mehbalıyev çıxış edərək, insanların hüquq və azadlıqlarının qorunması ilə bağlı ölkəmizdə həyata keçirilən hüquqi islahatlar, bu sahədə qanunvericilik bazasının təkmilləşdirilməsi və vətəndaşların hüquqi maarifləndirilməsi istiqamətində görülən tədbirlər barədə məlumat verib.

        Ordubad Rayon Prokurorluğunun köməkçisi Fərid Orucəliyev çıxışında insan hüquq və azadlıqlarının qorunması sahəsində müvafiq qurumların fəaliyyəti, qanunvericiliyin tələblərinə əməl olunması və vətəndaş müraciətlərinə həssas yanaşılması barədə danışıb. O, vətəndaşların hüquqlarının müdafiəsi  sahəsində həyata keçirilən tədbirlərin əhəmiyyətini vurğulayıb.

    Tədbirin sonunda iştirakçıları maraqlandıran suallar cavablandırılıb.