Azərbaycanda həyata keçirilən müstəqil xarici siyasət, iqtisadi inkişaf və enerji diplomatiyası sayəsində ölkəmiz qlobal arenada mövqeyini xeyli gücləndirmişdir. Regionun aparıcı güclərindən birinə çevrilən Azərbaycan, beynəlxalq təşkilatlarla əməkdaşlığı genişləndirərək dünya siyasətində fəal iştirak edir. Bakı-Tbilisi-Ceyhan neft kəməri, Cənub Qaz Dəhlizi kimi qlobal enerji layihələri Azərbaycanın strateji əhəmiyyətini artırmış, onu regionun enerji təhlükəsizliyində əsas oyunçulardan birinə çevirmişdir. Bununla yanaşı, Azərbaycan ədalətli və balanslı xarici siyasət yürüdərək müxtəlif beynəlxalq platformalarda, o cümlədən BMT, Qoşulmama Hərəkatı, Türk Dövlətləri Təşkilatı kimi qurumlarda fəal iştirak edir. Bundan əlavə, ölkənin Avropa İttifaqı, Asiya və Yaxın Şərq dövlətləri ilə iqtisadi və mədəni əməkdaşlıq imkanlarını genişləndirməsi Azərbaycanın dünya siyasətindəki mövqeyini daha da möhkəmləndirir. Bütün bu faktorlar Azərbaycanın təkcə regional deyil, qlobal miqyasda da etibarlı tərəfdaş və nüfuzlu oyunçu kimi tanınmasını təmin etmişdir.
Martın 13-də Bakıda “Dünya düzəninin yenidən düşünülməsi: Çağırışların fürsətə çevrilməsi” mövzusunda keçirilən XII Qlobal Bakı Forumu ölkəmizin dünyada yüksələn nüfuzunun bariz göstəricilərindən biri hesab edilir. Forumda Azərbaycan Prezidenti cənab İlham Əliyev də çıxış edib. O, çıxışında bir sıra qlobal və regional məsələlərə toxunaraq, Azərbaycanın beynəlxalq münasibətlərdə oynadığı rolu vurğulayıb. Dövlət başçısı qeyd edib ki, Qlobal Bakı Forumu artıq beynəlxalq gündəlikdəki vacib məsələlərin müzakirə olunduğu nüfuzlu platformaya çevrilib. O, forumun təşkilatçısı olan Nizami Gəncəvi Beynəlxalq Mərkəzinin üzvlərinə və rəhbərliyinə, eləcə də həmsədrlərə – xanım Vayra Vike-Freyberqaya və cənab İsmayıl Serageldinə Mərkəzin uğurlu fəaliyyətinə görə təşəkkürünü bildirib. Ölkə rəhbəri, həmçinin, Mərkəzin üzvlərinin ötən ilin noyabrında Bakıda keçirilən COP29 tədbirində fəal iştirakını vurğulayıb. Mərkəz bu tədbirdə 16 panel müzakirəsinə ev sahibliyi edib və öz pavilyonu ilə daha geniş miqyasda iştirak edib.
Prezident İlham Əliyev bildirib ki, Azərbaycanın COP29-a ev sahibliyi etməsi ölkəmizə olan etimadın və yaşıl enerji siyasətinə verilən yüksək qiymətin göstəricisidir. O qeyd edib ki, təbii sərvətlərlə zəngin olan Azərbaycan bərpaolunan enerjiyə böyük diqqət ayırır. Hazırda ölkənin enerji istehsalı gücü 8 giqavat təşkil edir və 2030-cu ilə qədər əsasən günəş, külək və hidroresurslar hesabına bu göstəricinin daha 6,5 giqavat artırılması planlaşdırılır. Dövlət başçısı bildirib ki, Azərbaycanın enerji ixracatı yalnız neft və qazla məhdudlaşmır, ölkəmiz həm də yaşıl enerji ixrac etməyə hazırlaşır. COP29 çərçivəsində Paris Sazişinin 10 ildən çox müddətdə həll olunmamış 6-cı maddəsi üzrə konsensusa nail olunması, həmçinin bərpaolunan enerji layihələri üçün maliyyələşmənin 100 milyard dollardan 300 milyard dollara qədər artırılması Azərbaycanın bu sahədəki qlobal liderliyini bir daha təsdiqləyib. Bu uğurların “Bakı sıçrayışı” kimi qiymətləndirildiyi qeyd olunub.
Ölkə başçısı Azərbaycanın enerji sahəsində oynadığı rolu vurğulayaraq bildirib ki, ölkəmiz hazırda 10-u Avropa İttifaqı ölkəsi olmaqla, 12 dövlətə təbii qaz ixrac edir. Avropa Komissiyası Azərbaycanı etibarlı enerji tərəfdaşı kimi qiymətləndirir. O, həmçinin, Azərbaycanın enerji layihələrinin bölgənin geosiyasi əhəmiyyətini artırdığını və regional sülhün bərqərar olması üçün səylərin davam etdiyini vurğulayıb. Dövlət başçısı Azərbaycanın xarici siyasətinin şaxələndirilmiş olduğunu və Qoşulmama Hərəkatı çərçivəsində 120 ölkə ilə sıx əməkdaşlıq etdiyini qeyd edib. Xüsusilə COVID-19 pandemiyası dövründə 80-dən çox ölkəyə humanitar və maliyyə yardımı göstərilməsini bu siyasətin uğurunun nümunəsi kimi dəyərləndirib.
Prezident İlham Əliyev çıxışında Ermənistanla sülh prosesinə də toxunaraq bildirib ki, Azərbaycan bu prosesin təşəbbüskarı olub və sülh müqaviləsinin əsas bəndlərinin razılaşdırıldığını vurğulayıb. O qeyd edib ki, Azərbaycan işğal dövründə xalqının yaşadığı ağır məhrumiyyətləri unutmur və azad olunmuş ərazilərin bərpası istiqamətində fəal iş aparır. Prezident, Ermənistanın keçmişdə törətdiyi müharibə cinayətlərini xatırladaraq vurğulayıb ki, 613 nəfərin qətlə yetirildiyi Xocalı soyqırımı və işğal dövründə 65 məscidin dağıdılması kimi faktlar unudulmamalıdır. Bununla yanaşı, Azərbaycan regionda sülhün və sabitliyin bərqərar olması üçün səy göstərməkdə davam edir.
Çıxışda həmçinin bəzi Qərb mediasının COP29-a qarşı qarayaxma kampaniyası apardığı bildirilib. Dövlət başçısı, keçmiş ABŞ Prezidenti Donald Trampın “saxta xəbərlər” ifadəsinə istinad edərək, bəzi Qərb mətbuatının – xüsusilə “The Washington Post”, “The New York Times”, “Politico” və digərlərinin Azərbaycana qarşı əsassız iddialar irəli sürdüyünü qeyd edib. O, həmçinin vurğulayıb ki, Fransa hökuməti və bir sıra Avropa dairələri Ermənistanın müdafiəsinə qalxaraq COP29-a qarşı təzyiqlər göstərməyə çalışıblar. Lakin bütün bu cəhdlərə baxmayaraq, tədbirdə 197 ölkədən nümayəndələr, 70 dövlət və hökumət başçısı iştirak edib. Yeganə iştirak etməyən ölkə isə Ermənistan olub.
Ölkə başçısı, Azərbaycan xalqının Ermənistanın işğalı və təcavüzü nəticəsində yaşadığı çətinlikləri unutmamasına baxmayaraq, regionda sülh və əməkdaşlığın təmin edilməsinin vacibliyini vurğulayıb. Prezident İlham Əliyev sülh prosesinin təşəbbüskarı kimi Azərbaycanın ədalətli şərtlərlə sülh sazişinə nail olmaq istədiyini bildirib. O, Azərbaycanın beynəlxalq hüquqa uyğun olaraq torpaqlarını geri qaytardığını xatırladıb və bəzi Qərb dairələrinin, xüsusilə Fransa və ABŞ-ın COP29 ərəfəsində Azərbaycanı qaralamaq üçün apardığı kampaniyaları kəskin tənqid edib. Prezident vurğulayıb ki, bu cəhdlər Azərbaycanı öz suverenliyindən və ərazi bütövlüyünü bərpa etmək istiqamətindəki siyasətindən yayındıra bilməyib.
Prezident İlham Əliyev çıxışında Azərbaycanın beynəlxalq platformalardakı mövqeyini möhkəmləndirmək, enerji təhlükəsizliyini təmin etmək, yaşıl enerjiyə keçidi sürətləndirmək və Cənubi Qafqazda sülh yaratmaq məqsədilə səylərini davam etdirəcəyini bildirib. Dövlət başçısı, həmçinin, Qlobal Bakı Forumunun dünya miqyaslı müzakirələrə töhfə verdiyini və Azərbaycanın beynəlxalq nüfuzunun daha da artdığını vurğulayıb.
