Ramazan bayramı İslam dünyasında ən mühüm dini bayramlardan biri hesab olunur. Bu bayram, müqəddəs Ramazan ayının sona çatması ilə qeyd edilir. Ramazan bayramı müsəlmanlar üçün ibadət, bağışlanma, xeyirxahlıq və sevinc günləridir. Orucluq ayı boyunca səbir və mənəvi təmizliyə nail olan möminlər bu bayramı ruhən və cismən saflaşma günü kimi qəbul edirlər.
Ramazan bayramı müsəlman dünyasında həm dini, həm də sosial cəhətdən böyük önəm daşıyır. Bayram günləri insanlar bir-birilərini təbrik edir, qohum və dostlarını ziyarət edirlər. Bayramın əsas rituallarından biri bayram namazıdır. Bayram namazı səhər tezdən məscidlərdə qılınır və bu namaz müsəlmanlar üçün birliyə və həmrəyliyə çağırışın simvoludur. Fitrə zəkatı bayramın vacib hissələrindən biridir. Ramazan ayında ibadətin və orucun qəbul olunması üçün hər bir müsəlman ailəsi imkanı çatan miqdarda fitrə zəkatı verməlidir. Bu, kasıblara, ehtiyacı olan insanlara kömək etmək və bayram sevincini hər kəsə yaşatmaq üçün nəzərdə tutulmuş bir yardımdır. Ramazan bayramı ailə və cəmiyyət həyatında xüsusi yer tutur. Bayram günlərində dünyasını dəyişmiş yaxınların məzarları ziyarət edilərək dualar oxunur. Ehtiyacı olanlara yardım edilir, xeyriyyə işləri görülür.
Bütün bu adətlər Ramazan bayramının əsas mahiyyətini – paylaşmağı, mərhəməti və sevgini vurğulayır. Bu bayram təkcə dini bayram kimi deyil, həm də cəmiyyətin birliyini və mənəvi dəyərlərini gücləndirən bir gün kimi qəbul edilir. Bayram həm də xeyriyyəçilik ənənələrinin möhkəmləndiyi, yardımlaşma ruhunun canlandığı bir dövrdür. Ramazan bayramı müsəlmanlar üçün yalnız bir qeyd etmə günü deyil, həm də mənəvi saflaşma, birlik və paylaşma rəmzidir. Bu bayramın əsas məqsədi insanlara sevgi, mərhəmət və xeyirxahlıq duyğularını aşılayaraq cəmiyyətin daha insani dəyərlər üzərində qurulmasına töhfə verməkdir.