Ordubad rayonunun Düylün kəndində Vətən müharibəsi şəhidi Abdullayev İntiqam Allahverdi oğlunun anım günü ilə əlaqədar tədbir keçirilib. Mərasimdə Ordubad Rayon İcra Hakimiyyəti başçısının müavini, İcra Hakimiyyətininin, Polis şöbəsinin, Sosial Xidmətlər Agentliyinin, Səfərbərlik xidmətinin, müvafiq kənd ərazisində fəaliyyət göstərən idarə, müəssisə və təşkilatların rəhbər şəxsləri və əməkdaşları, şəhid ailələri, şəhidin yaxınları və kənd ictimaiyyəti iştirak edib.
İştirakçılar əvvəlcə şəhidin məzarını ziyarət edərək üzərinə tər güllər düzüb, ruhuna dualar oxuyublar. Daha sonra İntiqam Abdullayevin Vətən uğrunda göstərdiyi igidlik və fədakarlıq yad edilib. Çıxış edənlər onun döyüş yolu, vətənpərvərliyi və əzmkarlığı barədə danışıblar. Bildirilib ki, şəhidlərin qəhrəmanlığı heç zaman unudulmayacaq və gələcək nəsillərə nümunə olacaqdır. Daha sonra məktəblilər vətənpərvərlik mövzusunda şeirlər səsləndirblər.
Qeyd edək ki, Abdullayev İntiqam Allahverdi oğlu Vətən müharibəsində qəhrəmanlıq göstərərək şəhid olub və ölümündən sonra “Kəlbəcərin azad olunmasına görə”, “Vətən uğrunda”, “Şücaətə görə” medalları və “3-cü dərəcəli Rəşadət Ordeni” ilə təltif edilib.
