Vətən müharibəsi zamanı ölkəmizin ərazi bütövlüyü uğrunda qəhrəmancasına şəhidlik zirvəsinə ucalan Məmmədəliyev Saday Rza oğlunun doğum günü ilə əlaqədar 2025-ci il martın 1-də dəfn olunduğu Darkənd kəndində anım tədbiri keçirilib və məzarı ziyarət olunub.
Tədbirdə Ordubad Rayon İcra Hakimiyyəti başçısının müavini, İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin, Polis Şöbəsinin, Sosial Xidmətlər Agentliyinin əməkdaşları, şəhid ailələri, qazilər, hərbiçilər, eləcə də ictimaiyyət nümayəndələri iştirak ediblər. Çıxışlar dinlənilib, şəhidin ruhuna dualar oxunub.
Çıxış edənlər Azərbaycanın ərazi bütövlüyünün qorunması, torpaqlarımızın işğaldan azad olunması və suverenliyimizin bərpası uğrunda canlarından keçən qəhrəmanlarımızın xatirəsinin daim ehtiramla yad edildiyini bildiriblər. Şəhid Məmmədəliyev Sadayın həyatı və döyüş yolu barədə ətraflı məlumat verilib, onun gənclər üçün vətənpərvərlik və qəhrəmanlıq nümunəsi olduğu vurğulanıb.
Sonda məktəblilər tərəfindən şəhidin xatirəsinə həsr olunmuş vətənpərvərlik mövzusunda şeirlər səsləndirilib.
