Azərbaycan Respublikasının Prezidenti cənab İlham Əliyevin tapşırıq və tövsiyələrinə uyğun olaraq vətəndaş məmnunluğunun təmin edilməsi, müraciətlərin yerində araşdırılması və mövcud problemlərin birbaşa həlli məqsədilə Ordubad Rayon İcra Hakimiyyətinin başçısı Rəcəb Rəhimli tərəfindən 20 dekabr 2024-cü il tarixdə Şəhriyar qəsəbə İnzibati Ərazi Dairəsi üzrə nümayəndəliyin tərkibinə daxil olan Kotam kəndində səyyar qəbul keçirilib. Görüşdə İcra Hakimiyyətinin məsul əməkdaşları, xidməti təşkilatların rəhbərləri, müvafiq qəsəbənin icra nümayəndəsi və bələdiyyə sədri iştirak ediblər.
Ordubad Rayon İcra Hakimiyyətinin başçısı Rəcəb Rəhimli vətəndaşları salamlayaraq ölkədə həyata keçirilən genişmiqyaslı abadlıq-quruculuq fəaliyyətləri, nəzərdə tutulan infrastruktur layihələri, əhalinin sosial problemlərinin həlli istiqamətində görülmüş tədbirlər və bu sahədə qarşıda duran vəzifələrlə bağlı sakinləri məlumatlandırıb. Azərbaycanın Vətən müharibəsində əldə etdiyi zəfərin dövlətimizin həm hərbi, həm də siyasi müstəvidə mövqeyini gücləndirdiyini və dünya ictimaiyyətində ölkəmizə olan etimadı artırdığını qeyd edən rayon İcra Hakimiyyətinin başçısı, COP29 sammitinin keçirilməsinin və ölkəmizin dünyanın nüfuzlu qurumlarından olan D-8 təşkilatına tamhüquqlu üzv seçilməsinin Azərbaycanın beynəlxalq aləmdə yüksələn nüfuzunun bariz göstəricisi olduğunu vurğulayıb. İcra başçısı yaxın perspektivdə reallaşması gözlənilən Zəngəzur dəhlizi layihəsinin ölkəmizin Türk dünyası ilə mədəni-siyasi, sosial-iqtisadi əlaqələri daha da gücləndirəcəyini, bölgədə nəqliyyat əlaqələrinin daha da intensiv hal alması və turizmə yaradacağı imkanlar sayəsində bu dəhlizin giriş qapısı sayılan Ordubad rayonunun inkişafına böyük töhfə verəcəyini qeyd edib.
“2023-2027-ci illərdə Naxçıvan Muxtar Respublikasının sosial-iqtisadi inkişafı Dövlət Proqramı” və bu proqramın Ordubad rayonunu da əhatə edən “2023-2024-cü illər üzrə Təfsilatlı Tədbirlər Planı” haqqında məlumat verən Ordubad Rayon İcra Hakimiyyətinin başçısı Rəcəb Rəhimli, dövlət proqramında nəzərdə tutulan tədbirlərin icrasının həyata keçirilməsi üçün müvafiq addımların atıldığını, 2025-ci ildən etibarən isə görüləcək işlərin daha da sürətlənəcəyini bildirib. Çıxış zamanı rayonun yeraltı sərvətlərinin istifadəsi, xüsusən də mədən sənayesi sahəsinin yenidən dirçəldilməsi istiqamətində işlərə başlanıldığı, yaxın perspektivdə xalçaçılıq-ipəkçilik və konserv məhsullarının istehsal olunacağı müəssisələrin yaradılmasının nəzərdə tutulduğu qeyd olunub.
Görüşdə həmçinin “Ordubad” Dövlət Tarix-Mədəniyyət Qoruğunun yaradılması haqqında Prezident İlham Əliyevin 21 fevral 2024-cü il tarixli Sərəncamı ilə gələcəkdə rayonun bölgədə əsas turizm mərkəzlərindən birinə çevriləcəyi, bu məqsədlə də ilk olaraq yeni Hotel tikintisinin başlanması yönündə fəaliyyətin icra olunduğu bildirilib. Ordubadın qədim sənətkarlıq ənənələrini dirçəltmək və tarixi simasını bərpa etmək məqsədilə “Sərşəhər” məhəlləsinin, “Mədrəsə” binasının və “Ərbabın evi” adlanan qədim tikilinin hərtərəfli restavrasiya olunacağı, bu işlərin şəhərin yeni hazırlanan baş planına uyğun həyata keçiriləcəyi iştirakçıların diqqətinə çatdırılıb.
Daha sonra sakinlərlə kəndin ümumi problemləri müzakirə edilib, onların məşğulluq, sosial, torpaq mübahisəsi, marşrut xəttinin ardıcıllığının təmin edilməsi və sair problemləri ilə bağlı səsləndirdikləri məsələlər məsul şəxslərin iştirakı ilə yerindəcə araşdırılaraq həlli ilə bağlı tədbirlər müəyyənləşdirilib. Həlli vaxt tələb edən məsələlər isə nəzarətə götürülməklə aidiyyəti təşkilat rəhbərlərinə müvafiq tapşırıqlar verilib. Sakinlər rayon ərazisində vətəndaşların qəbulu və müraciətlərinə baxılması üçün rahat və əlverişli şərait yaradılmasından razılıqlarını ifadə edərək, göstərilən diqqət və qayğıya görə ölkə rəhbərliyinə öz minnətdarlıqlarını bildiriblər.
