Ordubad Rayon İcra Hakimiyyətinin başçısı Rəcəb Rəhimli tərəfindən 4 mart 2025-ci il tarixdə Nüsnüs kəndində səyyar qəbul keçirilib. Vətəndaş məmnunluğunun təmin edilməsi və mövcud problemlərin yerində həll olunması məqsədilə təşkil olunan görüşdə İcra Hakimiyyətinin məsul əməkdaşları, xidmət təşkilatlarının rəhbərləri və kənd icra nümayəndəsi iştirak ediblər.
Ordubad Rayon İcra Hakimiyyətinin başçısı Rəcəb Rəhimli çıxış edərək kənd sakinlərini Ramazan ayının başlanması, Od çərşənbəsi və qarşıdan gələn 8 Mart – Beynəlxalq Qadınlar Günü münasibətilə təbrik edib, onlara uğurlar arzulayıb. Daha sonra icra başçısı ölkədə həyata keçirilən genişmiqyaslı sosial-iqtisadi islahatlardan və əldə olunan mühüm nailiyyətlərdən bəhs edib. Həmçinin dünyada gedən geosiyasi proseslərə toxunaraq, Prezident İlham Əliyevin rəhbərliyi ilə Azərbaycanın diplomatik arenada həyata keçirdiyi uğurlu xarici siyasət xəttinin önəmini vurğulayıb. Bildirilib ki, 44 günlük Vətən müharibəsində qazanılmış Zəfər və 2023-cü ildə aparılan lokal antiterror tədbirləri nəticəsində ölkəmizin ərazi bütövlüyü və suverenliyi tam bərpa olunub. Bu qələbələr Azərbaycanın beynəlxalq aləmdə nüfuzunu daha da artırıb və ölkəmiz regionda sülhün və təhlükəsizliyin təminatçısı kimi mövqelərini möhkəmləndirib.
İcra başçısı, tezliklə açılışı gözlənilən İğdır-Naxçıvan qaz xətti layihəsinin regionda enerji təhlükəsizliyinin təmin edilməsində mühüm rol oynayacağını qeyd edib. Bu layihənin əhalinin dayanıqlı enerji resursları ilə təminatına mühim töhfə verəcəyini bildirib. Görüşdə Zəngəzur dəhlizinin region və rayon üçün strateji əhəmiyyəti də vurğulanıb. Bildirilib ki, bu layihənin reallaşması Azərbaycanın tranzit potensialını artıracaq və türk dünyasını birləşdirən əsas nəqliyyat-kommunikasiya şəbəkələrindən birinə çevriləcəkdir. Zəngəzur dəhlizinin açılması rayon iqtisadiyyatına da mühüm töhfə verəcək, yeni iş yerlərinin yaradılmasına imkan yaradacaqdır. İcra başçısı “2023-2027-ci illərdə Naxçıvan Muxtar Respublikasının sosial-iqtisadi inkişafı Dövlət Proqramı” çərçivəsində görülən işlər haqqında danışaraq bu ildən etibarən nəzərdə tutulan tədbirlərin icrasının daha da sürətlənəcəyini bildirib. Rayon ərazisində mədən sənayesinin yenidən dirçəldilməsi, yol infrastrukturunun bərpası istiqamətində əsaslı işlərin görüləcəyi, Ordubadın gələcəkdə əsas turizm mərkəzlərindən birinə çevrilməsi üçün müvafiq addımların atılacağı yerli sakinlərin diqqətinə çatdırılıb.
Eyni zamanda, Ordubadın qədim sənətkarlıq ənənələrini dirçəltmək və tarixi simasını bərpa etmək məqsədilə “Sərşəhər” məscidi, “Mədrəsə” binası və “Ərbabın evi” adlanan tikililərin hərtərəfli bərpa ediləcəyi, bu işlərin şəhərin yeni hazırlanan baş planına uyğun həyata keçiriləcəyi bildirilib.
Daha sonra sakinlərlə kəndin ümumi problemləri müzakirə edilib. Onların məşğulluq, ekologiya, sosial yardım, kənd məscidinin bərpası və digər məsələlərlə bağlı müraciətləri məsul şəxslərin iştirakı ilə yerində araşdırılıb və həlli üçün tədbirlər müəyyənləşdirilib. Həlli vaxt tələb edən məsələlər nəzarətə götürülərək aidiyyəti təşkilat rəhbərlərinə müvafiq tapşırıqlar verilib. Sakinlər vətəndaşların qəbulu və müraciətlərinə baxılması üçün yaradılan əlverişli şəraitdən razılıqlarını bildirərək, göstərilən diqqət və qayğıya görə ölkə rəhbərliyinə minnətdarlıqlarını ifadə ediblər.
