Ordubad Rayon İcra Hakimiyyətinin başçısı Rəcəb Rəhimli tərəfindən 14 fevral 2025-ci il tarixində Yuxarı Əylis kəndində səyyar qəbul keçirilib. Azərbaycan Respublikasının Prezidenti cənab İlham Əliyevin vətəndaş müraciətlərinin həlli ilə bağlı tövsiyə və göstərişlərinə uyğun olaraq keçirilən görüşdə kənd sakinləri ilə yanaşı İcra Hakimiyyətinin məsul əməkdaşları, rayonun idarə, müəssisə və təşkilat rəhbərləri, eləcə də kənd icra nümayəndəsi iştirak ediblər.
Ordubad Rayon İcra Hakimiyyətinin başçısı Rəcəb Rəhimli çıxış edərək, ölkədə həyata keçirilən sosial-iqtisadi islahatlar, regional inkişaf proqramları və vətəndaş rifahının yüksəldilməsi istiqamətində görülən işlər barədə məlumat verib. O, Azərbaycanın Vətən müharibəsində qazandığı Zəfərin dövlətimizin həm hərbi, həm də siyasi müstəvidə mövqeyini gücləndirdiyini və dünya ictimaiyyətində ölkəmizə olan etimadı artırdığını qeyd edib. Həmçinin ötən ilin noyabr ayında ölkəmizdə keçirilən COP29 konfransının Azərbaycanın beynəlxalq aləmdə yüksələn nüfuzunun göstəricisi olduğunu vurğulayıb. Qeyd olunub ki, Azərbaycan bugün regionda əsas söz sahibi kimi çıxış edir və beynəlxalq əməkdaşlıqda fəal rol oynayır. İcra başçısı 2025-ci ilin ölkəmizdə "Konstitusiya və Suverenlik İli" elan edilməsi ilə bağlı sərəncamın əhəmiyyətindən də danışıb. Bildirilib ki, bu qərar Azərbaycanın müstəqillik və suverenlik prinsiplərinin daha da möhkəmləndirilməsinə, hüquqi bazanın inkişafına və dövlətçiliyin güclənməsinə xidmət edir. Görüş zamanı “2023-2027-ci illərdə Naxçıvan Muxtar Respublikasının sosial-iqtisadi inkişafı Dövlət Proqramı” haqqında da məlumat verilib və 2025-ci ildən etibarən nəzərdə tutulan işlərin daha da sürətlənəcəyi bildirilib.
Qəbulda yaxın gələcəkdə Zəngəzur dəhlizi layihəsinin reallaşması nəticəsində Türk dünyası ilə mədəni-siyasi, sosial-iqtisadi əlaqələrin daha da güclənəcəyi, bölgədə nəqliyyat əlaqələrinin intensivləşəcəyi və turizmin inkişaf edəcəyi qeyd olunub. Bu dəhlizin yaradacağı imkanlar sayəsində Ordubad rayonunun inkişafında yeni mərhələnin başlanacağı və bölgənin sosial-iqtisadi tərəqqisinə mühim töhfə verəcəyi vurğulanıb.
Çıxış zamanı yaxın perspektivdə rayon ərazisində yol infrastrukturunun yenidən qurulması, intensiv meyvə bağlarının salınması, yeraltı sərvətlərin istifadəsi, xüsusən də mədən sənayesinin yenidən dirçəldilməsi istiqamətində işlərə başlanılacağı qeyd olunub. Həmçinin ipəkçilik və konserv məhsulları istehsal edəcək müəssisələrin yaradılmasının nəzərdə tutulduğu bildirilib.
Daha sonra sakinlərlə kəndin ümumi problemləri müzakirə edilib, onların məşğulluq, su təsərrüfatı, sosial yardım və digər məsələlərlə bağlı səsləndirdikləri problemlər məsul şəxslərin iştirakı ilə yerindəcə araşdırılıb və həlli üçün müvafiq tədbirlər müəyyənləşdirilib. Həlli vaxt tələb edən məsələlər isə nəzarətə götürülərək aidiyyəti təşkilat rəhbərlərinə müvafiq tapşırıqlar verilib. Sakinlər rayon ərazisində vətəndaşların qəbulu və müraciətlərinə baxılması üçün yaradılan rahat və əlverişli şəraitdən məmnun olduqlarını ifadə edərək göstərilən diqqət və qayğıya görə ölkə rəhbərliyinə minnətdarlıqlarını bildiriblər.
