Azərbaycan Silahlı Qüvvələri tərəfindən Ermənistan işğalı altında olan ərazilərimizin azad edilməsi üçün başlanan Vətən müharibəsi zamanı Füzuli rayonunun azadlığı uğrunda gedən döyüşlərdə şəhidlik zirvəsinə ucalmış Xəlilli Namiq Həsən oğlunun doğum günü ilə əlaqədar tədbir keçirilib, şəhidin məzarı ziyarət olunub. Mərasimdə Ordubad rayon İcra Hakimiyyəti başçısının müavini, İcra Hakimiyyətininin, Sosial Xidmətlər Agentliyinin, Polis şöbəsinin, Səfərbərlik xidmətinin, müvafiq kənd ərazisində fəaliyyət göstərən idarə, müəssisə və təşkilatların əməkdaşları, şəhid ailələri, qazilər, şəhidin yaxınları və kənd ictimaiyyəti iştirak edib.
Çıxışlarda şəhidin həyatı və döyüş yolu barədə məlumat verilib. Həmçinin, Vətən müharibəsi və lokal xarakterli antiterror əməliyyatı ilə Qarabağ və Şərqi Zəngəzurun azad edilməsindən, qazanılmış tarixi Zəfər nəticəsində ərazi bütövlüyümüzün və suverenliyimizin tam bərpa olunmasından bəhs edilib. Dövlətimizin şəhid ailələri və müharibə iştirakçılarına diqqət və qayğısının hər zaman ön planda olduğu vurğulanıb.
Azadkənd kənd tam orta məktəbinin şagirdləri tərəfindən şəhidlərin xatirəsinə həsr edilmiş vətənpərvərlik mövzusunda şeirlər səsləndirilib, şəhidin ruhuna dualar oxunub.
Şəhidin yaxınları şəhid ailələrinə göstərilən diqqət və qayğıya, şəhidlərin xatirəsinin hər zaman hörmət və ehtiramla yad edilməsinə görə minnətdarlıq ediblər.
